Атырау, 25 маусым 01:54
 бұлттыВ Атырау +26
$ 465.28
€ 499.20
₽ 5.33

Құлсарыда ауыз су тапшы

Сурет Бейнежазба
759 просмотра

Жылыой ауданы Құлсары қаласы тұрғындары «АЖ» редакциясына хабарласып, ауыз судың тапшылығына қатысты дабыл түсірді. 

- Су сағаттап берілуде. Белгіленген уақыттарда жеткілікті суды жинап алу мүмкін емес, сыздықтап тұр, жарытусыз. Оның үстіне судың түсі өзгеріп кеткен, сап-сары, әрі бөтен иісі бар. Бұл ішуге де, кір жууға да келмейді. Көпқабатты үйде тұратындар әжетханаға су таба алмай отыр, бұл не масқара? Дүкендердегі суға таласып отырмыз, ол да жетпей жатыр, - дейді су мәселесінен қиналған Құлсары тұрғындары.

Қала Қиғаш өзенінен келетін суға тәуелді. Өзеннен келетін техникалық су «Магистральдық суағызғы» ЖШС арқылы тазаланып, «Жылыойсу» МКК-нің су айдау станциялары арқылы таратылады.

«Жылыойсу» МКК әкімшілігінің тұрғындарға таратқан хабарламасында былай делінген: «МКК-ның су айдау станциясының (ВНС) су сақтау қазандарындағы су деңгейі азайып кетіп отыр. Оған себеп, ВНС-қа су жеткізіп беруші «Магистральдық суағызғы» ЖШС-нің су тазарту станциясы (ВОС) тарапынан Қиғаш өзенінен келіп тұрған техникалық суды тазартып үлгермеуіне байланысты болып отыр. Яғни, ВНС-ты қажетті су қорымен қамтамасыз ете алмай отыр. Қазандардағы су көлемінің аз болуына орай тұрғындарды сумен жеткілікті қамту мүмкін емес». 

Су тапшылығына орай, кестемен беріліп отыр, таңертең сағат 06.00-09.00, түсте 11.00-14.00, кеште 18.00-21.00. 

Судың өзгерісіне байланысты «Магистральдық Суағызғы» ЖШС  бас директорының міндетін атқарушы Е.ТАҢҚЫБАЕВ мекемелерге мынадай тұрғыда хат жолдаған: «Астрахань-Маңғышлақ» магистральдық суағызғысын қайта құру және кеңейту, 1-кезек»  жобасын іске асыру шеңберінде, 56-207 км магистральдық құбыр жолының жаңа учаскесі пайдалануға берілді. Осыған байланысты органолептикалық көрсеткіштер бойынша «Астрахань-Маңғышлақ» магистральдық суағызғысы берілетін техникалық су сапасының шамалы өзгеруі мүмкін екенін хабарлаймыз».

- Қазіргі таңда  «Ұлттық сараптама орталығының» Жылыой аудандық филиалы мамандарымен «Магистральдық суағызғы» ЖШС-нің аудандық филиалы мен «Жылыойсу» МКК-ның су қазандарынан сынама алынды. Сынама қорытындысын күтіп отырмыз, қосымша хабарлаймыз, - дейді Құлсары қаласының әкімі Қадыржан АДИНОВ.

- Жалпы мониторинг бойынша су құбырларынан  ай сайын су сынамасы алынатын болса, тасқын су басқан уақыттан бастап апта сайын орталық су құбырларынан су сынамасы алынып келеді, - дейді санитарлық-эпидемиологиялық бақылау департаментінің басшысы Әлия БЕКЕШОВА. - Соңғы өткен аптадағы су сынамалары қортындылары таза. Осы аптада алынатын су сынамалары қортындылары шыққасын қосымша хабарланады.”

«АЖ»-ға барлық нормативке сай келетін су беру қашан қалпына келтірілетінін нақтылаған жоқ. Дегенмен, қазандықтардағы су ертерек бітсе, кестеге қарамастан су мерзімінен бұрын тоқтатылатыны айтылды.

Ләззат ҚАРАЖАНОВА  

Тұрғындар жолдаған суреттер мен бейнежазба

25 мамыр, 13:35

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы мақала тақырыбына қатысты ой-пікіріңізбен бөлісіп, бейнежазба жолдағыңыз келсе, WhatsApp +7 700 672 70 30 нөміріне және editor@azh.kz поштасына жібере аласыз.