Атырау, 25 сәуір 00:48
 ашықВ Атырау +21
$ 443.85
€ 474.30
₽ 4.80

«ҚазМұнайГаз» бен «Татнефть» «Қаратон Подсолевой» учаскесінде геологиялық барлауды бастайды

862 просмотра

«ҚазМұнайГаз» ҰК АҚ және «Татнефть» ЖАҚ Атырау облысындағы «Қаратон Подсолевой» жер қойнауы учаскесінде геологиялық барлау жұмыстарын жүргізу үшін бірлескен кәсіпорынның негізін қалайды, деп хабарлайды ұлттық компанияның баспасөз қызметі.

Бұл туралы келісімге 2024 жылы 21 ақпанда Қазан қаласында қол жеткізілді. «ҚазМұнайГаз» ҰК АҚ және «Татнефть» ЖАҚ Сатып алу-сату шартына, Акционерлер келісіміне және «Қаратон Подсолевой» жобасы бойынша қаржыландыру туралы келісімге қол қойды.

«ҚазМұнайГаз» Сатып алу-сату шарты бойынша Karaton Operating Ltd. («Қаратон Подсолевой» жобасының операторы) компаниясының 50% үлесін «Татнефть» ЖАҚ-қа сатады.

Құжаттарға «ҚазМұнайГаз» ҰК АҚ Басқарма Төрағасы Мағзұм Мырзағалиев пен «Татнефть» ЖАҚ бас директоры Наиль Маганов қол қойды.

«Мемлекет басшысы шикізат секторы мен геологиялық барлауға шетелдік инвестиция тарту туралы міндет қойды. Осыған байланысты біз бірқатар инвестормен келіссөз жүргіздік және «Қаратон Подсолевой» жобасы бойынша серіктесіміз геологиялық барлау және мұнай-газ кен орындарын игеру саласында тәжірибесі мол «Татнефть» компаниясы атанғанына қуаныштымыз. Тереңдігі 5500 метр болатын алғашқы барлау ұңғымасын бұрғылау 2024 жылға жоспарланып отыр», — деп атап өтті М. Мырзағалиев.

«Қазақстандық әріптестерімізбен түрлі бағыт бойынша өзара тиімді байланыста жұмыс істеп келеміз және бұл жемісті ынтымақтастығымыздың ауқымы кеңейіп келе жатқанына қуаныштымыз. «ҚазМұнайГазға» әріптестік бойынша ұсыныс, оның ішінде геологиялық барлау саласындағы серіктестікке шақырғаны үшін алғыс айтамыз», — деп атап өтті Н. Маганов.

«Қаратон Подсолевой» учаскесі Атырау және Маңғыстау облыстарында «Ембімұнайгаз» АҚ кен орындарының жанында орналасқан.

2023 жылы маусымда «ҚазМұнайГаз» «Қаратон Подсолевой» жер қойнауы учаскесінде көмірсутектерді барлауға және өндіруге келісімшарт алды, ал 2023 жылы қыркүйекте жобаны іске асыру үшін «Астана» халықаралық қаржы орталығының аумағында Karaton Operating Ltd. жеке компаниясы тіркелді. Сол жылы қарашада ҚМГ жер қойнауын пайдалану құқығын Karaton Operating Ltd. пайдасына берді.

22 ақпан, 10:06

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы мақала тақырыбына қатысты ой-пікіріңізбен бөлісіп, бейнежазба жолдағыңыз келсе, WhatsApp +7 771 37 800 38 нөміріне және editor@azh.kz поштасына жібере аласыз.