Серік Шәпкенов медицина туралы есеп берді

Бүгін, 26 қарашада ҚР Премьер-Министрі Әлихан СМАЙЫЛОВТЫҢ төрағалығымен өткен үкімет отырысында Атырау облысының әкімі Серік ШӘПКЕНОВ алғашқы медициналық-санитариялық көмектің қолжетімділігін жақсарту туралы баяндама жасады, деп хабарлайды облыс әкімінің баспасөз қызметі.

Аймақта «Ауылдық денсаулық сақтауды жаңғырту» ұлттық жобасы аясында 18 медициналық-санитариялық көмек нысанын салу қарастырылған. Оның үшеуі жыл соңына дейін пайдалануға беріледі. Ал қалған 15 нысанның құрылысы 2024 жылы басталады.

- Жергілікті бюджет есебінен 19 нысанның құрылысы жоспарланған. Оның ішінде 12 нысанның құрылысы осы жыл соңына дейін аяқталады. Ал 5 нысанның құрылысы 2024 жылы басталады. «Өркен» және «Нұрсая» ықшамаудандарында республикалық бюджеттен жоспарланған күніне 250 науқас қабылдайтын 2 емхананың құрылысын жеделдету мақсатында жергілікті бюджеттен қаражат қарастырып, құрылыс жұмыстарын бастадық. Медициналық жабдық сатып алу үшін биыл жергілікті бюджеттен 4,7 млрд теңге бөлінді. Бұл медициналық жабдықтармен жарақтандыру деңгейін 93,5%-ға жеткізуге мүмкіндік береді. Жыл басынан бері 406 арыз-шағым келіп түскен, оның ішінде 74 шағым негізді, 73 шағым ішінара негізді, 259 шағым негізсіз деп анықталды. Бұл кемшіліктерді жою және алдын алу мақсатында жұмыстар жүріп жатыр. Медициналық-санитариялық көмек қолжетімділігін жақсарту, медициналық көмек сапасын арттыру шаралары жалғасын табады. Бұл мәселені өз бақылауыма алдым,- деді С.Шәпкенов. 

Атырау облысы бойынша биыл жергілікті бюджет есебінен 39 медициналық жедел жәрдем көлігі сатып алынып, олар желтоқсан айында жеткізіледі. Өңірде 2023 жылдың 1 қыркүйегіндегі жағдай бойынша сақтандырылмаған азаматтар саны - 74 876 адам. Бұл өткен жылмен салыстырғанда 17,6%-ға төмен.

Республикалық бюджеттен амбулаторлық дәрі-дәрмекпен қамтамасыз ету бойынша 2023 жылға 5,6 млрд теңге жоспарланып, дәрі-дәрмекпен қамтамасыз етілуде. Сонымен қатар жергілікті бюджеттен 301 млн теңге бөлінді. Облыста жыл басында кадр тапшылығы 185 маманды құраған болса, бүгінде 102 маман жұмысқа қабылданды.

Медициналық ұйымдардағы арыз-шағымдарды болдырмау мақсатында тәулік бойы қоңырау қабылдайтын 1309 колл-орталық қызметі іске қосылды және ситуациялық орталық жұмысы жолға қойылды.

Дайындаған Ләззат ҚАРАЖАНОВА

ӨКҚ жолдаған суреттер