В Атырау +4.4 
2026 жылғы 19 қарашаға жоспарланған Grand Theft Auto VI ойынының шығуы АҚШ пен Ұлыбритания қызметкерлері арасында ерекше дүрбелең туғызды. Мыңдаған геймер ойын шыққаннан кейінгі алғашқы күндерін ойынға арнау үшін демалыстарын алдын ала рәсімдеп жатыр. Зерттеу деректеріне сүйенсек, кейбір қызметкерлер тіпті жұмысқа бармау үшін ауырып қалған сыңай танытуды да жоспарлап отыр.
NME басылымы BrightHR компаниясының зерттеуіне сілтеме жасап хабарлағандай, Ұлыбританияда қызметкерлер GTA 6 ойынының шығуына байланысты шамамен 83 мың күндік еңбек демалысын жоспарлаған. Қызметкерлердің жұмыс орнында болмауына байланысты жұмыс берушілердің ықтимал шығыны 12,4 миллион фунт стерлингке бағаланып отыр.
BrightHR мамандары Ұлыбританиядағы 70 мың компанияның 1,2 миллионнан астам қызметкеріне қатысты деректерді талдаған. Нәтижесінде 19 қарашаға берілген демалыс өтініштерінің саны өткен жылдың осы кезеңімен салыстырғанда 7,9%-ға артқаны анықталды. Сонымен қатар қызметкерлер жұмысқа келмеу себебін көрсеткен өтініштердің шамамен 5%-ы тікелей GTA 6 ойынымен байланысты.
Осыған ұқсас жағдай АҚШ-та да байқалады. BambooHR кадрлық платформасының зерттеуіне сәйкес, тұрақты жалақы алатын сауалнамаға қатысқан қызметкерлердің 18%-ы ойын шығатын күні жұмыстан бір күн демалуды жоспарлап отыр. Z буыны өкілдері арасында бұл көрсеткіш 32%-ға, ал миллениалдар арасында 27%-ға жетеді.
Бұдан бөлек, алдағы ойын релизіне байланысты жұмысқа бармауды көздеген геймерлердің жартысы еңбек демалысын алдын ала рәсімдегеннен гөрі, ауырып қалғанын айтуды жөн көретінін мойындаған.
Мұндай жоғары қызығушылық Grand Theft Auto сериясының жаңа бөлімін ұзақ уақыт күтуге байланысты. Серияның алдыңғы ойыны — GTA 5 — 2013 жылы жарық көрді. Осылайша, франшиза жанкүйерлері жалғасын 13 жылдан астам уақыт күткен.
Rockstar Games компаниясының ресми ақпаратына сәйкес, GTA 6 ойыны 2026 жылғы 19 қарашада PlayStation 5 және Xbox Series X|S платформаларында жарық көреді. Ойын оқиғалары ойдан шығарылған АҚШ-тың Леонида штатында, соның ішінде әйгілі Вайс-Сити қаласында өрбиді.