Яндекстің негізін қалаушы кәсіпкер Қазақстанда туылғанын мәлімдеп, Украинадағы соғысқа қарсы пікір айтты

Ол 2014 жылдан бері Ресейде тұрмайтынын мәлімдеді. Яндекстің негізін қалаушы Аркадий Волож 2022 жылдың ақпанынан бастап алғаш рет Ресейдің Украинаға басып кіруі туралы өз пікірін айтты, деп хабарлайды Azattyq Ruhy BBC Russian-ға сілтеме жасап.

«Мен Ресейдің Украинаға баса-көктеп шабуыл жасауына үзілді-кесілді қарсымын, онда менің көптеген достарым мен туыстарым бар. Мен күн сайын украиналықтардың үйлеріне бомбалар түсіп жатқанынан қорқамын», — деді Волож.

Оның айтуынша, 2014 жылдан бері Ресейде тұрмағанына қарамастан, ол елдің іс-әрекеті үшін оның да мойнында жауапкершіліктің үлесі бар екенін түсінеді.

«Менің үнсіз қалуымның көптеген себептері болды. Менің мәлімдемемнің уақытылы айтылмағаны туралы дауласуға болады, бірақ оның мәні туралы емес. Мен соғысқа қарсымын», - делінген хабарламада.

Волож бұл мәлімдемесін журналистер кәсіпкердің жеке сайтында жарияланған өмірбаянға назар аударғаннан кейін көп ұзамай жариялады.

Онда Волож өзін Қазақстанда туылған израильдік кәсіпкер деп атады. Оның өмірбаянында «Ресей» оның тұратын және бизнесін жүргізіп жатқан ел ретінде көрсетілмеген.