В Атырау
+2 
Финляндияның Лахти қаласында парадзюдодан Small Country Challenge турнирі өтті.
57 келіге дейінгі салмақта атыраулық спортшы Альфия Тілекқабыл (суретте сол жақта) күміс жүлдені жеңіп алды. Ол Венгрия мен Финляндия өкілдерін ұтып, финалда Суоми елінің тағы бір өкілінен ұтылды.
* * * * *
Командалық кумите бойынша Малайзияда өткен Азия чемпионатында атыраулық спортшылар Батырғали Әбілмансұр мен Нұрберген Дамир Филиппин, Таиланд, Кувейт командаларынан басым түсті.
Алайда шешуші айқаста Иран құрамасының спортшыларына есе жіберіп алды. Нәтижесінде – күміс жүлдеге ие болды.
* * * * *
Оралда муай-тайдан жасөспірімдер мен жастар арасында ҚР чемпионаты өтті.
Атырау облысының құрамасы 3 алтын, 11 қола алқа жеңіп алды. Бұл оған 3-командалық орынды иеленуге мүмкіндік берді.
* * * * *
Моңғолияда джиу-джитсудан әлем чемпионаты өтті, оған 41 елден 500-ден астам спортшы қатысты. Облыс құрамасының бас бапкері Айбар Есенғалиевтың жетекшілігімен атыраулық джитсерлер командасы 2 алтын, бір күміс және бір қола алқаны жеңіп алды.
Денис Нұрлыбаев (суретте) 56 келіге дейінгі салмақта ересектер санатында үздік атанды. Бұл оның әлем чемпионы ретінде алған екінші алқасы. Ардагерлер арасында Русланхан Мадыханов чемпион атанса, осы жас санатында да бақ сынаған А.Есенғалиев қола жүлдегер атанды. Әйелдер арасында Әйгерім Төреғожина күміс жүлде иеленді.
* * * * *
Түркістанда қыркүйек айында Қытайдың Гуанчжоу қаласында өтетін Азия ойындарына іріктеу үшін таэквондодан Азия кубогы өтті.
Атыраулық спортшылар Мария Севостьянова (57 келіге дейін) мен Нұрай Хусайынова (67 келіге дейін) Азия кубогын жеңіп алды. Олар жақын арада Гуанчжоуға аттанады.
* * * * *
Астанада белдесіп күресуден әлем чемпионаты өтті. Ерлер арасында 8, әйелдер арасында 5 жүлде жиынтығы ойналды. Жарысқа Беларусь, Бельгия, Колумбия, Эквадор, Үндістан, Иран және басқа да көптеген елдерден 300-ден астам спортшы қатысты.
75 келіге дейінгі салмақта ел намысын атыраулық Саян Қайырғалиев қорғап, қола жүлдегер атанды. Саян Беларусь, Өзбекстан және Молдовадан келген қарсыластарынан басым түскенімен, жартылай финалда тағы бір қазақстандық қатысушыға жол берді.
Дайындаған Мұрат СҰЛТАНҒАЛИЕВ