В Атырау +5.4 
Атырау облысындағы Қашаған газ өңдеу зауыты 65,08%-ға дайын. Бұл ретте құрылыс-монтаждау және іске қосу-баптау жұмыстары жартысынан да аз — 47,82%-ға орындалған. Осы жылдың сәуір айында Премьер-министр Олжас Бектенов кәсіпорын құрылысын 2026 жылдың соңына дейін аяқтауды тапсырған еді. Ал енді зауытты іске қосу 2027 жылдың үшінші тоқсанына жоспарланып отыр.
Құрылыстың барысы туралы «Самұрық-Қазына» қорының баспасөз қызметі хабарлады. Қуаты жылына 1 миллиард текше метр газды құрайтын жобаны QazaqGaz ұлттық компаниясы жүзеге асырып жатыр.
Қордың мәліметінше, құрылыс алаңында 1702 маман тартылған, оның 1124-і тікелей өндірістік персоналға жатады. 160-қа жуық жұмысшы түнгі ауысымда еңбек етуде. Объектіде 314 бірліктен астам құрылыс техникасы пайдаланылуда.
Қазір іргетасының жұмыстары, технологиялық жабдықтар мен қызмет көрсету алаңшаларын монтаждау жалғасып жатыр. Газгольдерлерді гидравликалық сынау аяқталды.
Жекелеген жұмыстардың орындалу деңгейі төмендегідей:
Бетон жұмыстары — 83,2%, 66 961 текше метр орындалды.
Металл конструкцияларын монтаждау — 72,6%, 15 047 тонна орнатылды.
Механикалық жабдықтарды монтаждау — 64,6%, 6509 тонна смонтаждалды.
Резервуарларды монтаждау — 92,6%, 1863 тонна орнатылды.
Жер асты құбырларын төсеу — 72%, 35 661 метр төселді.
Жер үсті құбырларын монтаждау — барлығы 7,6%, 7691 метр смонтаждалды.
Осылайша, жобаның жалпы дайындығы 65%-дан асса да, құрылыстың кейбір бағыттары басқаларынан айтарлықтай артта қалып отыр. Атап айтқанда, жер үсті құбырларын монтаждау жоспарланған көлемнің оннан бір бөлігінен де аз орындалған.
Бектенов құрылысты 2026 жылы-ақ аяқтауды тапсырған еді
Еске сала кетейік, 2026 жылғы 14 сәуірде Үкімет отырысында Премьер-министр Олжас Бектенов газ саласының ірі жобаларын жүзеге асыруды жеделдетуді талап еткен болатын.
«Энергетика министрлігіне QazaqGaz және «ҚазМұнайГаз» компанияларымен бірлесіп, ағымдағы жылы Қашағандағы көлемі 1 млрд текше метрлік газ өңдеу зауытының құрылысын аяқтауды, ал келесі жылдың басында Жаңаөзендегі зауытты пайдалануға беруді тапсырамын», — деді Үкімет басшысы.
Сонымен бірге ол газдың қолжетімділігін арттыру үшін стратегиялық маңызы зор деп атаған «Бейнеу — Бозой — Шымкент» магистральдық газ құбырының екінші желісінің құрылысына қатаң бақылауды қамтамасыз етуді талап етті.
2026 жылдың шілдесінде QazaqGaz басқарма төрағасы Әлібек Жамауов та жыл соңына дейін Қашаған ГӨЗ-інде құрылыс-монтаждау жұмыстарын аяқтау ниеті туралы хабарлаған еді. Ол кезде жобаның жалпы дайындығы 61,4%-ға, ал негізгі жабдықтарды жеткізу 98%-ға бағаланған болатын.
Алайда күзге қарай бекітілген мерзімдер өзгерді.
Зауытты іске қосу мерзімі 2027 жылдың үшінші тоқсанына шегерілді
2026 жылғы 3 қарашада Президент Қасым-Жомарт Тоқаевпен кездесуде QazaqGaz басшысы Әлібек Жамауов Қашаған газ өңдеу зауытын пайдалануға беру 2027 жылдың үшінші тоқсанына, яғни шілде мен қыркүйек аралығындағы кезеңге жоспарланып отырғанын хабарлады.
Сәуір айында Үкімет құрылысты 2026 жылы аяқтауды талап еткен еді, ал енді кәсіпорынды іске қосу келесі жылдың екінші жартысында ғана күтілуде.
«Самұрық-Қазынаның» жаңа хабарламасында құрылыс кестесінің сақталуын күшейтілген бақылау туралы айтылған, алайда бұрын жарияланған мерзімдердің өзгеру себептері ашып айтылмаған.
Қашаған газ өңдеу зауыты Қазақстанға не береді
Кәсіпорын жылына 1 миллиард текше метр шикі газды өңдеуге есептелген. Оны пайдалануға беру Қазақстанның ішкі нарығы үшін қолжетімді тауарлық газ көлемін арттыруы тиіс.
Бұл жоба елдегі газ тұтынудың өсуі және Үкіметтің өңірлерді газдандыруды кеңейту жоспарлары аясында ерекше мәнге ие.
Биылғы бірінші ГӨЗ-ден бөлек, Қашаған жобасы бойынша қуаты жылына 2,5 миллиард текше метр болатын екінші газ өңдеу зауытын салу жоспарланып отыр. Оны іске қосу 2030 жылға межеленген.
Сондай-ақ Қазақстан Қарашығанақ пен Жаңаөзендегі жаңа кәсіпорындар есебінен газ өңдеу көлемін арттыруды көздейді.
Энергетика министрлігінің мәліметінше, ішкі тұтынуға арналған тауарлық газ өндірісі 2025 жылғы 27,4 миллиард текше метрден 2032 жылы 35,5 миллиардқа дейін өсуі тиіс.