Орталық көпірді «орташа жөндеу» қандай болмақ

Қала әкімдігінде орталық көпірдің қалай жөнделетіні айтылды.

Еске салсақ, наурыз айының басында қала әкімі Мейірім ҚАЛАУИ алдағы уақытта қаладағы орталық көпірдің «орташа» жөндеу жұмыстарына жабылатынын хабарлаған болатын. Жөндеу жұмыстарының құны мен көпірдің жабылу мерзімі көктемде белгілі болады деп болжанған. Алайда, белгілі болғандай, техникалық құжаттаманы әзірлеу аяқталмаған (бұны «Шахар-Көкше» ЖШС жүргізіп жатыр) - сметалық бөлігі және мемлекеттік сараптамадан өтуі қалған, оны осы айдың соңына қарай алу жоспарланған.

«Жобалау жұмыстары аяқталғаннан кейін көпірдің қанша уақытқа жабылатыны және жөндеудің қанша уақытқа созылатыны көрсетілген кесте беріледі», - делінген қалалық әкімдіктің «АЖ» сауалына берген жауабында.

Жауапта жоспарланған жұмыс түрлері де сипатталған. Деформациялық жіктерді ауыстыру, тротуарларды қалпына келтіру, жолдың су бұру бөлігін жақсарту, жарықтандыру жүйесін ауыстыру, барлық құрылымдар мен элементтерді тазалау және қайта бояу, ішкі су жолдарының навигациялық жабдықтарын орналастыру, көпір тіректері мен аралықтарын жөндеу, автоматтандырылған мониторинг жүйесін орнату жоспарлануда.

«Мониторинг жүйесі жоғары дәлдіктегі өлшеу құралдарын (датчиктер) пайдалана отырып, көпірдің жай-күйі мен жұмыс жағдайын нақты уақыт режимінде бақылауды ұйымдастыру үшін қолданылады», - деп түсіндірді қала әкімінің орынбасары Серік НЫСАНБАЕВТЫҢ қолы қойылған хатта. Тіректерде және деформациялық жіктер аймағында көлбеу бұрышының датчигі мен жарықшақ өлшегіштері орнатылады.

Бұл мониторинг, бұрын хабарланғандай, тозығы жеткен құрылысты (көпірге 58 жыл болған) бұзу керек пе, әлде оны одан әрі пайдалануға болатын-болмайтынын шешуге көмектеседі.

«Қазіргі уақытта автоматтандырылған мониторинг жүйесін жасаумен және орнатумен айналысатын «КазМониторинг Солюшинс» ЖШС-не баға ұсынысы бойынша сұраныс жіберілді», - деп түйіндеді әкімдіктегілер.

Лев ГУЗИКОВ