Жастар тракторшы немесе краншы болғысы келмейді

15 маусымда Apec Training Center оқу орталығында жастарға арналған «Бос жұмыс орындары жәрмеңкесі» өтті. Оған барлығы 250-ге жуық жұмыс орнын ұсынған 30 компания қатысты.

Ұйымдастырушылар – облыстық ішкі саясат басқармасы, Жұмыспен қамту және әлеуметтік бағдарламаларды үйлестіру басқармасы мен жастар ресурстық орталығы. Жұмыс берушілер - мұнай және мұнай сервисі компаниялары, Атырау мұнай өңдеу зауыты, құрылыс фирмалары, қонақ үй, мектеп, балабақша, автоорталық, коммуналдық қызметтер және т. б. Жәрмеңкеге мыңнан астам адам жұмыс іздеп келген, басым көпшілігі ер адамдар. Дегенмен, көптеген фирмалардағы бос орындар ер адамдарға қолайлы: ағаш өңдеуші, слесарь, геодезист, құбырларды жобалаушы, монтер, сантехник, жүргізуші, күзетші. Сондай-ақ кадрларды іріктеуші мамандар, талдаушылар, пән мұғалімдері, ақпараттық-коммуникациялық технология мамандары, орталықтандырылған бақылау пультінің операторлары, құрылыс-монтаж жұмыстарының сапасы мен қабылдануы жөніндегі инспекторлар, тігіншілер және т. б. қажет. Қауіпсіздікті қамтамасыз ету, кен орындарын игеру, бақылау-өлшеу және басқару жүйелері, СУТП желісінің қауіпсіздігін қамтамасыз ету және т. б. бойынша инженерлер үлкен сұранысқа ие.

Асланбек РҮСТЕМОВ 21 жаста, оның негізінен құрылыс және интерьер дизайны саласында уақытша жұмыс тәжірибесі бар. Бірақ шығармашыл жігіт тұрақты табыс тапқысы келеді. Бос жұмыс орындарының тізімін қарап шыққаннан кейін ол үлкен таңдау бар екенін атап өтті:

- Осы жерден лайықты жұмыс табамын деп үміттенемін.

– Жыл басынан бері ауқымды «Бос жұмыс орындары жәрмеңкесі» облыс орталығында осымен үшінші рет өткізіліп отыр; аудандарда ай сайын ұйымдастырылып келеді. Өздеріңіз білесіздер, биыл жастардың жас «шегі» 35 жасқа дейін көтерілді, әсіресе осы санаттағылар үшін мемлекет тарапынан түрлі әлеуметтік қолдау бағдарламалары, оның ішінде жастар тәжірибесін және 1,5 жылға дейінгі алғашқы жұмыс орнын субсидиялау жүзеге асырылуда, – дейді облыстық ішкі саясат басқармасының басшысы Гүлнұр СҮЙЕУОВА. - Бұл қолдау шаралары жас мамандарға өте қажет тәжірибе алуға мүмкіндік береді.

«Атырау көлік» ЖШС жүргізуші, тракторшы, краншы, экскаваторшы іздейді. Жүргізушілер табылады, ал қалған қызметкерлерді табу қиынға соғады екен.

– Қазір бізде зейнет жасы жақын қызметкерлер бар, ал тәжірибелі жастар жоқ. Ал бұл жұмыста тәжірибе өте қажет, – дейді «Атырау Көлік» ЖШС кадрлар жөніндегі инспекторы Раушан ТАСМҰХАНОВА.

Шағын компаниялар өздерін жастар үшін мансаптық өсуге қажетті полигон ретінде көретіндігіне шағымданады: өздерінен тәжірибе жинақтаған мамандар ірі компанияларға жоғары жалақысы бар қызметтерге кетіп қалады. Бірақ жалақыны көтермесе, бұл процесті болдырмау мүмкін емес секілді.

Жұмыс берушілер бүгін көп түйіндеме алды, енді оларды қарауға уақыт қажет.

- Бірақ келесі күні қоңырау шалмаса да, көңіліңізді түсірмеу керек, өйткені сіздің түйіндемеңіз жұмыс берушілердің дерекқорына түседі және сізге сәйкес келетін бос жұмыс орны ашылған бойда шақыруы мүмкін, - деп сендіреді тәжірибелі HR-мамандары.

Зульфия ИСКАЛИЕВА

Суреттерді түсірген автор