Ақтөбе-Астрахань трассасында бекіре балығы тиелген көлік ұсталды

Ақтөбе-Астрахань трассасында Атырау облыстық ПД қызметкерлері браконьерлік жасады деп күдіктелген 30 жастағы ер адамды ұстады. Ер адамның көлігінен 70 келідей бекіре тұқымдас балық табылды. 

«21 желтоқсанда шамамен 12:50-де 30 жастағы ер адамның көлігінен полиэтилен пакетіне салынған 23 дана бекіре тұқымдас балық табылған. Қылмыстық іс-әрекетті Атырау облысы ПД-нің жанындағы патрульдік полиция қызметкерлері «Бекіре-2021» жедел профилактикалық іс-шара бойынша «Ақтөбе-Астрахань» тас жолы бойында тексеру жұмыстарын жүргізу барысында анықтаған», - делінген хабарламада. 

Аталған 23 дана бекіре тұқымдас балықты «Жайық-Атырау бекіре балық өсіру» зауытына тапсырған кезде, жалпы салмағы 67 кг 600 грамды құрап, сәйкес құжаттар жасақталған. 

«Қазіргі уақытта көрсетілген факті бойынша, ҚР ҚК-нің 339-бабы 2-бөлігі 5-тармағында қарастырылған қылмысқа күдікті көлік жүргізушісі мен жолаушысына қатысты сотқа дейінгі тергеп-тексеру жұмыстары басталды», - деп хабарлады Атырау облысы полиция департаментінің бастығы полиция полковнигі Қамза Үмбетқалиев.

Айта кетейік, полицейлер тәркілеген заңсыз ауланған балық бекіре зауытына тапсырылады. Одан соң, сот үкіміне сәйкес мемлекет пайдасына сатылады.