В Атырау +20 
Қазақстанның Ішкі істер министрлігі ел аумағында уақытша жүрген шетелдіктер мен азаматтығы жоқ адамдарға жеке сәйкестендіру нөмірін (ЖСН) қалыптастыру және түзету бойынша мемлекеттік қызмет көрсету қағидаларына өзгерістер енгізуді көздейтін түзетулер әзірледі.
Жобаға сәйкес, ЖСН рәсімдеу кезінде шетел азаматы туралы мәліметтер оның Қазақстанда болу немесе тұру талаптарына сәйкестігі тұрғысынан қосымша тексеріледі. Ол үшін иммигранттардың эталондық деректер базасындағы ақпаратты пайдалану жоспарланып отыр.
ІІМ мұндай тексеру мемлекеттік қызмет көрсету кезінде адамның елде заңды түрде жүрген-жүрмегенін анықтауға және ЖСН қалыптастыру кезінде пайдаланылатын мәліметтердің дұрыстығын арттыруға мүмкіндік береді деп есептейді.
Өзгерістер ЖСН-ді алғаш рет рәсімдеуге де, оны түзетуге де қатысты.
Бұйрық жобасы «Ашық НҚА» порталында жарияланды. Қоғамдық талқылау 2026 жылғы 28 қазанға дейін жалғасады. Әзірге бұл күшіне енген қағидалар емес, тек жоба екенін ескерген жөн.
Түзетулер 2026 жылғы 24 маусымдағы заңды іске асыру мақсатында әзірленген. Аталған заңмен цифрландыру, дербес деректерді қорғау, жол қозғалысы және көліктегі озық технологияларды реттеу мәселелері бойынша заңнамаға өзгерістер енгізілген.
Осылайша, жоба мақұлданған жағдайда, шетел азаматына ЖСН беру рәсімі оның Қазақстандағы көші-қон мәртебесін тексерумен тікелей байланысты болады.