20 қарашада Атырау қаласында мектеп оқушылары мен жүкті әйелерге, бала емізетін аналарға Pfizer вакцинасын егу басталды.
Шараның маңыздылығын ескере отырып, Ф.Досымова атындағы №12 орта мектебінде Атырау облысы әкімінің орынбасары Бақытгүл ХАМЕНОВА мен облыстық денсаулық сақтау басқармасының басшысы Асхан БАЙДУАЛИЕВ баласына екпе салдыруға келісімін берген ата-аналармен, оқушылармен кездесті.
- Атырауға коронавирусқа қарсы ең алғаш вакцина келгенде мен де ең алғашқылардың бірі болып екпе алғанмын. Мен де балама салдырар едім бірақ әзірге жасы жетпеді. Ол уақыт та келер, - деді кездесу барысында Б.Хаменова.
Асхан Байдуалиевтің сөзінше, мектептерде алдын ала мектеп директорларымен, оқушылардың ата-анасымен кездесулер өткен. Онда медицина қызметкерлері Pfizer – ресми сертификатталған екпе, Европа мен Америка елдеріне де осы вацинамен шыға беруге болады деп түсіндірген. Шетелде білім алғысы келген түлектерге бұл өте маңызды дәлел болды.
Ата-аналардың бірі Ольга ПЕТРОВАНЫҢ айтуынша, ол қызының денсаулығы үшін осы екпені салдыруға өтініш берген. Өзі де ақпанда вакцина алған алғашқылардың қатарында болып еді.
- Түсінігі бар әрбір отбасы вакцинаға қарсы болмайды деп санаймын. Менің қызым да еш қобалжымай, осы екпені алуға дайын болды, - деді ата-ана.
Осы кезде Геолог емханасында 6 жасөспірім мен бала емізетін 6 ана вакцина алып жатты.
- Менің 4 балам бар. Кенжесі 5 айлық. Кез келген уақытта біз вирус жұқтырып, баланы ауыртуымыз мүмкін. Балалардың денсаулығына алаңдаған соң, осы вакцинаны алуға шешім қабылдадым, - дейді Жұлдыз 3 ықшамауданының тұрғыны Нұрлы НАБЕРЕНОВА.
Айта кетсек, 19 қарашада Атырауға Pfizer екпесінің 1-2 компонентінен 32 760 дозасы келген еді. Оның бір құтысы 6 адамға бөлініп салынады. Вакцинаның екінші дозасы 21-28 күнде егіледі. Екпе 12-18 жастағы балаларға заңды өкілінің рұқсатымен ғана салынады. Вакцинаны мектептен немесе тіркелген емханадан ала алады.
Нұрбейбіт Нұғыманов
Суреттер мен бейнежазбаны түсірген автор