Сарытоғайлық жігіт жоғары технологиялық есептегіш шығару ісін жолға қоюда

Цифрландыру тұрғын үй-коммуналдық шаруашылық саласына да жетті: Атырауда есептеу құралдарын шығару бойынша инновациялық жоба жүзеге асырылуда. Ыстық және салқын суға арналған механикалық, импульстік және электронды есептегіштердің 12 моделін шығару жоспарлануда. Соңғы екі түрі көрсеткіштерді интернет арқылы автоматты түрде энергия-ресурс компаниясына жолдайды.

Жоба бастамашысы әрі ұйымдастырушысы - жас кәсіпкер Жеңіс БЕКБАСАРОВ басқаратын «GURYEV» ЖШС. Осы жылдың наурыз айының соңында Махамбет ауданының Сарытоғай ауылында «В10» ЖШС жүргізетін осындай өлшеу аспаптарын шығаратын зауыт құрылысы басталды. Іске қосу 2021 жылдың қыркүйегіне жоспарланған болатын, бірақ пандемияға байланысты құрылыс кешіктіріліп, мерзім жыл соңына дейін шегерілді.

Бекбасаровтың айтуынша, өнім желісінде LoRaWAN және NB-IoT жүйесі арқылы деректерді қашықтан жіберетін есептегіштердің 4 түрі бар:

- LoRaWAN - Қазақтелеком мен «ASTEL» базалық ретрансляторларына негізделген есептегіштер. NB-IoT GSM байланысы бар кез келген жерде жұмыс істейді, олар Active және Beeline байланысы бар шалғайдағы аудандарды цифрландыруға мүмкіндік береді. Бұл технология су шығынын дәл есепке алуды және шоттар бойынша автоматтандырылған төлем жасауды қамтамасыз етеді - бұл біріншіден, жыл сайын тарифтерді жоғарылату туралы өтінім беретін монополистерді «тәртіпке келтіруге», екіншіден, тұрғындарды есептегіштердің көрсеткіштерін ай сайын жіберіп отыратын міндеттемелерден босатуға мүмкіндік береді.

Жоба құны - 1 млрд теңге, оны бірнеше инвестор қаржыландырады. Зауыттың өндірістік қуаты - айына 18 мың есептегіш, онда 80 адам жұмыс істейтін болады, оның 70-і Махамбет ауданының тұрғындары: олар инженерлер мен бақылау-өлшеу аспаптарының техниктері, электрик, механик және термиялық өңдеу техниктері. Олар осы жабдықтар шығарылатын германиялық білікті мамандардан тәлім алады.

ИДЕЯ ҚАЛАЙ КЕЛДІ?

Бекбасаровтың өзі Сарытоғай ауылының тумасы, жерлестері үшін салмақты іс жасағысы келеді. Бірақ зауыт салынатын жер тек осы себептен ғана емес, қымбат емес жұмыс күшін тартуға мүмкіндік және инженерлік коммуникация бар болғандықтан да таңдалған.

Бұл идея Жеңіске 2014 жылы Германияның Штутгарт қаласындағы есептегіштер мен датчиктердің алуан түрін шығаратын зауытқа барған кезде келген:

- Олардың өнімдері бүкіл әлемге сатылды. Осындай зауытты біздің өңірден неге ашпасқа деген ой келді, - дейді Бекбасаров. Ол бұл мәселеге байыппен қарап, ұзақ уақыт өндірістің рентабельдігіне техникалық-экономикалық талдау жүргізді. Бұл идеяның өте тиімді екенін түсінгенде, жауапкершілігі шектеулі серіктестікті тіркеді. Бизнес-жоспар, техникалық-экономикалық негіздеме, сату мен іске асыру жоспары жасалды.

ШИКІЗАТ ҚАЙДАН АЛЫНАДЫ ЖӘНЕ ОЛ ҚАЛАЙ ЖҰМЫС ЖАСАЙДЫ

Кәсіпорын үшін шикізат - жез, полипропилен, пербутан, ферритин, болат. Олар Өскемен, Павлодар, Екібастұз қалаларындағы қазақстандық кен орындары мен металл өңдеу зауыттарынан сатып алынады. Бизнес-жоспарға сәйкес түпкілікті өнім бәсекелестердікінен айтарлықтай төмен болады: 4300-ден 20000 теңгеге дейін, ал басқаларында - 5000-нан 90 000 теңгеге дейінгі аралықта.

- Импульсті және электронды өлшеу аспаптары - «ақылды» үйдің ажырамас бөлігі. Электронды есептегіштер шалғай аудандарға да орнатылады. Бүгінде, мысалы, Сарытоғай ауылында аспаптар зең басқан құдыққа орнатылған, ол жерге түсіп, бір нәрсе көру қиын. Өнім шығаруды бастағаннан кейін бәрі басқаша болады. Тұрғын үйлер мен пәтерлерге орнатылған электронды есептегіштер LoRaWAN немесе NB-IoT хаттамасы арқылы мәліметтерді «Атырау облысы Су арнасы» КМК-не жолдайды, - дейді Ж.Бекбасаров. Ең бастысы, оның пікірінше, деректерді цифрландыру әлі де дұрыс берілмейтін су тұтыну көлемін максималды дәлдікпен анықтауға мүмкіндік береді:

- Механикалық есептегіштер су тұтынудың ресми көрсеткіштерін құрайтын және оның негізінде монополист тарифті көтеру туралы өтінім беретін бүкіл кемшіліктерді есепке алмайды. Жоғары технологиялық есептегіштер енгізілгенде, тұрғындар мен жұртшылыққа бұл процесті бақылау әлдеқайда жеңіл, - дейді Ж.Бекбасаров сенімді түрде.

Айнұр САПАРОВА