Дронның көмегімен ереже бұзушыларды ұстады

Атырауда тексерушілер дронның көмегімен карантинді бұзып, үйлену тойын жасағандарды анықтады.

8 тамызда қала әкімдігі жанындағы мониторинг тобына қала маңындағы Береке ауылында «Атамекен» демалыс базасында 90 адамға арналған той өтіп жатқаны туралы ақпарат түсті. База қаладан шамамен 10 шақырым жерде орналасқан.

- Мониторинг тобының мүшелері дронды әуеге көтеріп, шынымен де ол жерде көпшілік шара өтіп жатқанына көз жеткізіп, базаны бетке алды. База аумағында шамамен 70-90 қонақ жиналған үйлену тойы өтіп жатыр екен, той енді басталған. Той тоқтатылып, қонақтар үйлеріне таратылды, - деп хабарлайды қалалық әкімшіліктің баспасөз қызметі.

Жазбаша түсініктемеде демалыс базасының 35 жастағы әкімшісі салтанат өткізу үшін орынажайды жалға беру арқылы карантин шектеулерін бұзғанын мойындады. Түсініктеме және толтырылған хаттама қалалық санитариялық-эпидемиологиялық бақылау басқармасына жолданды. Жаза ретінде 230 АЕК (670 910 теңге) көлемінде айыппұл салынады.

Фархат ӘБІЛОВ