Челахтан жәбірленушілердің пайдасына 25 млн теңге өндіріледі

Судья Е.Ахметжанов. Фото Руслан ҚАНАБЕКОВТІКІ, BNews.kz.

Бүгін «Арқанкерген» ісі бойынша өмір бойы бас бостандығынан айырылған Владислав Челахтан жәбірленушілердің пайдасына 25 млн теңге өндіріледі, деп хабарлайды BNews.kz тілшісі.

«Жәбірленуші тараптың өкілі Саниннің Челахтан 7 млн 847 мың 373 теңге өндіру туралы талап арызы толығымен қанағаттандырылсын. Әскери бөлімнің пайдасына 7 млн 847 мың 373 теңге өндірілсін. Жәбірленушілердің өкілі Ким, Саринов, Әмірғалиев, Сисенов, Сәрсенбаевтың Челахтан 7 млн, 25 млн, 20 млн, 20 млн және 10 млн теңге өндіріп беру туралы талап арызы жартылай қанағаттандырылсын. Жәбірленуші Ким, Саринов, Әмірғалиев, Сисенов, Сәрсенбаевтың пайдасына сотталушыдан әрқайсына 5 млн теңгеден, жалпы 25 млн теңге өндірілсін», - деді судья Ербол Ахметжанов.

Естеріңізге сала кетейік, сот Владислав Челахты «Арқанкерген» шекара заставасында болған қанды оқиғаға қатысты ҚР Қылмыстық кодексінің баптарына сәйкес айыпты деп тауып, өмір бойына бас бостандығынан айыру жазасына кесті.

Дереккөз: bnews.kz