Атырау шенеуніктері: кімнің кабинеті үлкен?

«Кімнің тұрмысы жақсы болса, жұмысты да солай істейді» деген ҚР сенатының депутаты Гүлжан ҚАРАҒҰСОВАНЫҢ эпикалық сөзін атыраулық шенеуніктер кабинеттерін, демалыс бөлмелері мен қабылдау бөлмелерін таңдап, жабдықтау кезінде басшылыққа алатын секілді.

Қаржы министрлігі бекіткен нормаға сәйкес, облыстардағы аумақтық мемлекеттік орган басшысының кабинеті 25 ш.м.-ден, қабылдау бөлмесі 10 ш.м.-ден, ал басшы орынбасарының кабинетінің ауданы 20 ш.м.-ден аспауы тиіс.

Алайда Атырау облысы бойынша сыбайлас жемқорлыққа қарсы іс-қимыл департаменті жүргізген мониторинг барысында, мысалы, статистика департаменті басшысының кабинетінің ауданы екі бөлмелі пәтердей екені анықталды - 57,2 шаршы метр, қабылдау бөлмесі - 18,8 ш.м., ал орынбасардың кабинеті қарапайым - бар болғаны 20,1 шаршы метр. Полиция департаменті басшылығы орналасқан алаңдар 48/28,6/29,6 шаршы метр, ал мемлекеттік мүлік және жекешелендіру департаментінде - 40,2/13,4/17,4 ш.м. ҚР Қаржы министрлігінің бұйрығында аумақтық мемлекеттік органдардың басшылары үшін демалыс бөлмесі мүлде қарастырылмаған. Бірақ біздің басшыларымыздың кем дегенде кішігірім бөлмелері бар: полиция департаментінде және мемлекеттік кірістер департаментінде демалыс бөлмесі 15,9 шаршы метр болады, табиғи монополияларды реттеу департаментінде - 12,84 шаршы метр, қазынашылық департаментінде - 13,9 ш.м. Бұл тізімде жергілікті атқарушы органдардың басшылығы да бар. Атқарушы орган басшысының кабинеті 30 шаршы метрден, қабылдау бөлмесі - 7 шаршы метрден, ал орынбасардың кабинеті 20 шаршы метрден аспауы тиіс. Біздің өңірде кабинеттің ауданын орташа есеппен 13-14 шаршы метрден асыру қалыпты жағдай. Мемлекеттік сатып алу басқармасының басшысы ауданы 43,2 шаршы метр болатын кабинетке жайғасқан, қабылдау бөлмесі - 14 шаршы метр, ал басшы орынбасарының кабинеті - 27,13 шаршы метр. Мәдениет басқармасында да осындай заң бұзушылықтар бар. Мұнда басшы кабинетінің ауданы 44 шаршы метр, қабылдау бөлмесі 17 шаршы метр. Ал жұмыспен қамтуды үйлестіру және әлеуметтік бағдарламалар басқармасында – 43,3/15,4/27,8 ш.м.

- Жердің пайдаланылуы мен қорғалуын бақылау басқармасының орынжайды жылына 6 268 000 теңгеге, яғни айына 522 333 теңгеге жалдайтынын атап өткен жөн. Бірақ  одан төмен төлемдегі орынжайды табуға болар еді, - дейді Сыбайлас жемқорлыққа қарсы іс-қимыл департаментінің баспасөз қызметі.

Зульфия ИСКАЛИЕВА