В Атырау
+4 
Атыраудағы әйелдер түзету колониясының (УГ-157/11 мекемесі) сотталушылары өз еркімен қорғаныш маскаларын тігуді қолға алды. Бұл туралы Қылмыстық-атқару жүйесі департаментінің баспасөз қызметі хабарлады.
ҚАЖД баспасөз қызметінің мәліметінше, әйелдер күн сайын 1000-ға жуық маска тігуді жоспарлап отыр. Олар жергілікті құқық қорғау органдарының қызметкерлерін маскамен қамтымақ.
- Бұл өз ретімен, кезеңмен жүзеге асырылатын процесс: бірі үлгісін жасаса, екіншісі пішеді, үшіншілері резіңкесін дайындайды. Бүкіл процесске 5 минуттай уақыт кетеді, - деп хабарлайды ҚАЖД баспасөз қызметі.
Сотталғандардың бірі Ольга ВОЛОДИНА атап өткендей, қазіргі қиын жағдайда бір жеңнен қол, бір жағадан бас шығарып әрекет етіп, бір-бірімізге көмектесу өте маңызды.
- Қайда жүрсек те, біз өз еліміздің патриотымыз. Бостандықта туыстарымыз бен достарымыз өмір сүріп жатыр. Біз бір-бірімізге көмектесуіміз керек, - дейді Ольга Володина. - Мүмкін біздің қосқан титтей үлесіміз біреудің өміріне араша болар, өз қолымызбен тіккен маскалар біреуге көмектесер.
Фархат ӘБІЛОВ