Әлемдегі ең таза су Жезқазғанда

Шетелдіктерді Жезқазғанның жезі ғана емес, жер астынан шығатын экологиялық жағынан өте таза ауызсуы да қатты қызықтырып отыр. Бұл суды ішіп көрген еуропалықтар құрамында әртүрлі минералды тұздары бар «Боржомидан» бас тартып, Жезқазғанның мөлдір суын сатып ала бастады.

Жер ортасы - Жезқазғанның суына еуропалықтардың ынтық болуының өзіндік сыры бар. Жеті қабат жер астындағы мұ­зарттан еріген судың құрамында ешқандай минералдық тұздар жоқ, шын мәнінде табиғи дис­тилденген саф таза, ең сапалы су болып саналады. Суды құмыраларға құйып, Еуропаға асырып жатқан қазақстандық бизнесмен Воррахмет Елеевтің айтуынша, Жезқазған түбінен шығатын әлемдегі ең таза ауызсу Кеңес Одағы тұсында да өндірілген екен. Бірақ «Бор­жоми», «Ессентуки» минералды сулары сияқты кеңінен тарал­маған.

Тым тереңнен шығатын Жезқазған суына тең келетін ауызсу әлемде сирек кездеседі екен. Сондықтан ол ірі партия­лармен шығарылмайды. Мә­селе оның сапасы мен баға­сын­да. Сапалы судың қоры не­ғұрлым аз болған сайын, оның құны қымбат болатыны белгілі. Мысалы, Fine суы Фудзи тауының вулкандық бел­деулерінен 640 метр терең­діктен алынады және оның құмыраға құйылғаннан кейінгі құны - 6 доллар. Ал Ньюфаунд­ленд жағалауындағы 15 мың жылдық айсбергтерден алы­натын Berg атты судың жарты литрі 7 доллар тұрады. Саты­лымдағы судың ең қымбаты және ең тазасы - Канададағы Ванкувер қаласының солтүс­тігіне қарай екі жүз шақырымда тұрған мұзарттан шығатын «10 Thousand BC» сусыны көрі­неді.

Жезқазған суының алғашқы партиясы қандай бағамен қай елге кеткенін, сондай-ақ зәм-зәм бұлақтың көзі қай жерде екен­дігін бизнесмен әзірге ашып айтпай отыр.

Дереккөз: aikyn.kz