Қырғызстан Қордайдағы жаппай төбелеске байланысты шара қолданды

Сортөбе және Масанчи ауылдары Қырғызстанның Тоқмақ қаласына жақын орналасқан. Екі елдің шекарасындағы жағдай тұрақты.

Қазақ-қырғыз шекарасында орналасқан қырғыз шекарашылары қызмет атқарудың күшейтілген түріне ауыстырылды, деп хабарлады Қырғыз Республикасы мемлекеттік шекара қызметінің баспасөз қызметі.

Бұған дейін Қазақстанның Жамбыл облысындағы Сортөбе және Масанчи ауылдарында полиция қызметкерлеріне шабуыл жасалып, жаппай төбелес болғанын хабарлаған едік. Бұл ауылдар Қырғызстанның Шу облысындағы Тоқмақ қаласына жақын орналасқан. Қазақстан президенті жанжалды арандатушылар өз пайдасына қолданбақ болғанын атап өтті, деп жазды Sputnik Қырғызстан.

Қырғызстан мемлекеттік шекара қызметінің (МШҚ) баспасөз қызметі шекараның қазақ-қырғыз бөлігіндегі жағдай тұрақты екенін хабарлады.

"Шу облысының аумағымен шектесетін Қазақстанның Жамбыл облысының Қордай ауданында жағдайдың ушығуына байланысты шекарада орналасқан өткізу пункттері мен МШҚ бөлімшелері қызмет атқарудың күшейтілген түріне ауыстырылды", - делінген хабарламада.

Естеріңізге сала кетейік, кеше Жамбыл облысының Қордай ауданында жергілікті тұрғындар арасында жаппай төбелес болды. Өңірлік полиция департаменті жағдайдың бақылауға алынғанын хабарлады.

Тергеу басқармасында Қылмыстық кодекстің 293-бабы ("Бұзақылық") бойынша сотқа дейінгі тергеу басталды. Төбелес қатысушылары анықталып жатыр. 

Құқық қорғау органдары тек ресми ақпаратқа сеніп, жалған хабар таратпауға шақырды. 

Сондай-ақ, полиция әлеуметтік желі арқылы жалған ақпарат таратқандар қылмыстық жауапкершілікке тартылатынын ескертті. 

Дереккөз: Sputniknews.kz