В Атырау
+2 
БОКС
РФ Краснодар өлкесінің Каневская станицасында «Гладиатор - 5» кәсіби бокс кеші өтті. Онда Атыраудан барған Ержан Ордабаев бақ сынады.
25 жастағы жылыойлық спортшыға қарсы 39 жастағы ресейлік ардагер Александр Салтыков шықты. Жекпе-жек 6 раундқа созылуы тиіс еді, бірақ екінші раундта аяқталды. Ержан техникалық нокаутпен жеңіске жетті. Бұл оның кәсіби рингтегі екінші жеңісі болды. Ержан өзінің дебюттік жекпе-жегін 16 қыркүйекте Мәскеуде қарсыласы белорус Антош Бекишті нокаутқа құлатып, уақытынан бұрын жеңіске жеткен еді.
* * * * *
Таразда Әбдісәлім Өсенбаев мемориалы үшін 2004-05 ж.т. жасөспірімдер арасында Қазақстанның аймақтық чемпионаты өтті.
75 келіге дейінгі салмақта «алтынды» атыраулық спортшы Арсен Рахимов жеңіп алды. Ол 4 жекпе-жек өткізді, барлығында да жеңіске жетті.
КҮРЕС
Ақтөбеде Ақтан батырды еске алу құрметіне арналған грек – рим күресі бойынша турнир өтті.
78 келіге дейінгі салмақта 50-60 жас аралығындағы ардагерлер санатында Атыраудың намысын Қазақстанның еңбегі сіңген бапкері Рашид Мусин қорғады. Ол финалда Түркістандық палуан, әлем чемпионы Нұржан Асылбековпен кездесті. Жекпе-жек кезінде біздің палуан қолынан жарақат алды, дегенмен, жеңіске жетті.
СПАРТАКИАДА
Дене шынықтыруды дамыту орталығының бастамасымен колледж оқушылары арасында облыстық спартакиада өткізілді.
Жалпы саны 585 қатысушысы бар 13 команда спорттың 6 түрі бойынша - баскетбол, волейбол, гандбол, шахмат, тоғыз құмалақ және үстел теннисінен жарысты. 1 орынды Индер ауылшаруашылық көппрофильді колледжі, 2 орынды - С. Мұқашев атындағы политехникалық колледжі, 3- орынды энергетика және құрылыс колледжі алды.
Дайындаған Мұрат СҰЛТАНҒАЛИЕВ