В Атырау
0 
«Жайық» спорт кешенінде өткен марапаттау рәсімі тура «Оскар» сыйлығын табыстау салтанатындай ұйымдастырылған. Кеш қонақтары әдеттегі кимоно, кроссовкалармен емес, смокинг пен жылтыраған кеш көйлектерімен келген. Арнайы шақырылған қонақтар, көпшілігі олимпиада чемпиондары, әділқазылар алқасының шешімі жазылған қағазды конверттен әдейі асықпай шығарып, көпшілікті аузына қаратты. Номинация жеңімпазына бас мүсін, атақсыз қалған екі үміткерге басқа сыйлықтар тапсырылды. Кештің сәні ән мен биге ұласты.
Бас жүлде иегерлері:
«Жыл меценаты» - Ерлан ТАБЫЛДИЕВ, ол өз ақшасына «Мұнайшы» стадионында газонды ауыстырды және балалар үшін скейт-парк салып берді;
«Ең үздік ардагер-спортшы» - Рахия МОЛДАШЕВА, Армрестлингтен әлем және Азия чемпионы;
«Ең үздік команда» - Азия чемпионатында командалық жарыста «алтын» жеңіп алған парадзюдо бойынша облыс құрамасы;
«Паралимпиадалық спорт түрі бойынша жыл жаттықтырушысы» - Жандос ҚИЯНОВ;
«Жыл жаңалығы» - жастар арасында Азия чемпионатында «алтын» медаль иеленген Сабырғали АМАНАТ;
«Ең нәтижелі спорт түрі» - самбо: өткен жылы 5 атыраулық самбошы әлем чемпионы, 10 – Азия чемпионы, 6 – ҚР спартакиадасының жеңімпаздары атанды;
«Олимпиадалық емес спорт түрі бойынша жаттықтырушы» - Данияр Юсупов: кикбоксингтен облыс құрамасындағы тұрақты көрсеткіштері үшін;
«Ең үздік спорт бөлімі» - Құрманғазы ауданы: 2019 жылы аудандық команда 10 рет облыстық спартакиаданың жеңімпазы атанды;
«Ең спортшы әкім» - Жылыой ауданының әкімі Азамат БЕКЕТ;
«Ең үздік ауыл спортшысы» - Алмагүл ҚАНАТОВА, Армрестлингтен әлем және Азия чемпионы;
«Ұлттық спорт түрлері бойынша жыл спортшысы» - Эльмира САМИҒОЛЛАЕВА (қазақ күресі);
«Ең үздік спорттық ұйым» - Атырауда барлық марафондарды өткізудің ұйымдастырушысы - «Infinity» фитнес-орталығы;
«Жеңіске деген жігері үшін» - Серікжан ТҮСІПОВ: Сеулде әскери самбодан өткен әлем чемпионатында алдын ала болған айналымда мұрнынан зақым алса да, ақтық мәреге жетіп, күміс медаль иеленді;
«Жасөспірімдер арасындағы ең үздік спортшы» - Аманғали БЕКЗАТ, Азия чемпионатының күміс жүлдегері;
«Жылдың спорт жобасы» - жауынгерлік өнер фестивальдары;
«Кіші жасөспірімдер арасындағы ең үздік спортшы» - Зарина НҰРҒАЛИЕВА, шахматтан әлем және Азия чемпионы;
«Ең үздік спорт федерациясы» - облыстық карате-до федерациясы;
«Олимпиадалық спорт түрлері бойынша жыл жаттықтырушысы» - Аслан ЖАМАНБАЕВ, еркін күрестен әлем чемпионатының 2 дүркін қол жүлдегері Талғат Сырбаздың бапкері;
«Паралимпиадалық спорт түрлері бойынша жыл спортшысы» - Нұрлан ДОМБАЕВ, Азия, Еуропа және әлем чемпионы, 2020 жылғы Паралимпиада жолдамасының иегері;
«Олимпиадалық емес спорт түрі бойынша жыл спортшысы» - Жандос НАЗАРБЕКОВ, кикбоксингтен 2 дүркін әлем чемпионы;
«Ең үздік жас спортшы» - Батырғали ӘБІЛМАНСУР, карате-до бойынша әлем чемпионы. Әбілмансур күтпеген жерден мүсінді алудан бас тартып: «Мен оған ризамын, ол маған бапкерімдей болды!» деген ниетпен командадағы өзінен үлкен серіктесі Азия чемпионы Жаңбыр БЕЙБАРЫСҚА жолдады;
«Олимпиадалық спорт түрі бойынша жыл спортшысы» - Талғат СЫРБАЗ.
«Спорт хабарларын ең үздік таратушы» - «Caspian news» телеарнасы;
«Ең үздік спорт тілшісі» - «Қазақстан-Атырау» телеарнасының тілшісі Райымбек САФИОЛЛАЕВ.
Дайындаған Мұрат СҰЛТАНҒАЛИЕВ
Суреттер мен бейнежазбаны түсірген Нұрбейбіт НҰҒМАНОВ