Путин азаматтарды "шетел агенті" деп атауға мүмкіндік беретін заңға қол қойды

Ресей президенті Владимир Путин 2 желтоқсанда "Шетел агенттері" туралы заң деп аталып кеткен құжатқа енгізілетін түзетулерді мақұлдады. Кейбір сарапшылардың айтуынша, бұл заң ақпарат құралдарындағы плюрализм және еркін ой алмасуды шектейді.

Жаңа заң "шетел агенттері" тізіміне енген ұйымдарда жұмыс істейтін журналистерді "шетел агенті" деп атауға мүмкіндік береді. Мұндай атау шетел бұқаралық ақпарат құралдарымен әріптестік орнатып, солардан ақша алатын немесе өзге де материалдық тұрғыда қолдауға ие жеке тұлғаларға беріледі.

Егер шетелдің ақпарат құралдары Ресей заңын бұзса, қабылданған нормалар "шетел агенттері немесе олар жетекшілік ететін заңды тұлғалардың сайттарын бұғаттауға мүмкіндік береді" деп жазды ТАСС агенттігі.

"Шетел агенттері" туралы заң Ресейде 2012 жылы күшіне енген. Құжатқа сәйкес, шетелден қаржыландырылатын коммерциялық емес ұйымдар арнайы реестрде тіркелуі қажет. Бұл заң Владимир Путин билікке келген кезде туындаған үкіметке қарсы ірі наразылықтан кейін қабылданған. Бұл наразылық акцияларына байланысты пікірін айтқан Путин Батыстың ықпалы мен ақшасы туралы айтқан.

Құжатты сынаған кейбір сарапшылардың пікірінше, бұл заң ұйымдар мен журналистерді қаралауға қолайлы жағдай туғызады.

Бұған дейін он шақты халықаралық баспасөзді қорғау және құқық қорғау ұйымы (Amnesty International, Human Rights Watch, "Шекарасыз тілшілер", "Журналистерді қорғау комитеті" т.б) Ресей билігін заңға түзету енгізбеуге шақырған. Ресей зиялылары Владимир Путинге ашық хат жазып, заңнан бас тартуға шақырған.

Шетелден қаржыландырылатын ақпарат құралдарын "шетел агенті" деп атауға мүмкіндік беретін заң 2017 жылы қараша айында қабылданған.

Ресейдің әділет министрлігі "Америка дауысы" және Азат Еуропа/Азаттық радиосы медиакорпорациясының тоғыз редакциясын "шетел агенттері" қатарына енгізген: Азат Еуропа/Азаттық радиосы, Азаттықтың Орыс қызметінің "Сибирь.Реалии", "Фактограф" және "Север.Реалии" медиажобалары, "Настоящее Время" телеарнасы, Азаттықтың Татар-Башқұрт қызметі, Idel.Реалии, "Кавказ.Реалии" және Азаттықтың Украин қызметінің "Крым.Реалии" жобасы.

Бұған дейін Азат Еуропа/Азаттық радиосының президенті Джейми Флай "Шетел агенттері" туралы заңға енгізілетін түзетулер Азат Еуропа/Азаттық радиосы медиакорпорациясы мен өзге де шетелдік БАҚ-тың журналистерін қудалауға бағытталған және “Ресей азаматтарын тек Кремль мақұлдаған ақпаратпен қамтамасыз ету үшін” жасалған кезекті қадам деп мәлімдеген.

Дереккөз: Азаттық радиосы