Иранда ЦРУ-ға қатысы бар деп күдікке ілінген сегіз адам ұсталды

Иранның арнайы қызмет өкілдері АҚШ-тың орталық барлау басқармасына (ЦРУ) қатысы бар деп күдікке ілінген сегіз адамды ұстады. Бұл ақпаратты Иранның мемлекеттік IRNA агенттігі хабарлады. 

Тегеранның айтуынша, ұсталғандар өздерін азаматтық журналист ретінде таныстырып, "астыртын тыңшылықпен айналысқан". Олар "тәртіпсіздік туралы ақпарат жинап, шетелге жіберген".

IRNA-ның хабарлауынша, Иранның арнайы қызмет өкілдері бұған дейін оларды бақылаған. Вашингтон әзірге ақпаратқа байланысты түсініктеме бермеді.

Иранда қараша айының ортасында жаппай наразылық шаралары өтті. Әуел баста бензин құнының қымбаттауынан туындаған акциялар демде үкіметке қарсы шерулерге айналды. Наразыларды тарату үшін полицейлер күш қолданып, көзден жас ағызатын газ шашты.

Құқық қорғаушылар дерегінше, наразыларды тарату кезінде жүзден астам адам қаза тапқан. Азаттықтың Иран қызметінің хабарлауынша, бірнеше мың адам ұсталған. Бірнеше күн бойы интернет өшіп қалды.

АҚШ мемлекеттік хатшысы Майк Помпео Ирандағы наразыларды наразылық шарасынан фото мен видео жіберуге шақырды. Оның айтуынша, "наразыларға күш көрсеткені үшін және белсенділерді қудалағаны үшін" Вашингтон Тегеранға санкция салады.

Дереккөз: Азаттық радиосы