"Қазақ солдатының" 100 жылдығы аталып өтті

Кеңес одағының батыры Қ. СМАҒҰЛОВТЫҢ 100 жылдығы кеңінен аталып өтті деп хабарлайды Атырау қаласы әкімдігінің баспасөз қызметі.

Мерекелік шара батырдың ескерткішіне тағзым етіп, гүл қою рəсімінен басталды.

- Сұрапыл соғыс жылдарында Отан үшін ерлік көрсеткен батырлар аз емес, біз олардың ерен ерлігін ескеріп мақтан тұтып, даңқты бабаларды ешқашан ұмытпауға тиіспіз,- деді Атырау қаласы әкімінің орынбасары Ұ. ТНАЛИЕВ.

Мерейтой аясында батырдың есімімен аталатын мектепте оның өмірінен сыр шертетін құнды жәдігерлер жинақталған мұражайға экскурсия ұйымдастырылып шара Қайыршақты округіндегі мәдениет үйінде жалғасын тапты.

Томарлы ауылында өткен мерекелік кеште батырдың ерлігін есте қалдыру мақсатында естеліктер айтылып көркем өнерпаздар өнерін көрсетті.

Кеңес одағының батыры Қ. Смағұлов 1919 жылы Атырауда дүниеге келген. Соғыстан кейінгі жылдары әр түрлі лауазымды қызмет атқарып, Атырау университетінде қызмет еткен болатын. Батырдың өмірі мен ерлігі Ғ.Мүсіреповтің «Қазақ солдаты» шығармасына арқау болған болатын.

Атырау қаласы әкімдігінің баспасөз қызметі