Атырау, 29 наурыз 14:07
 ашықВ Атырау +4
$ 448.15
€ 483.46
₽ 4.86

Ақ үй: Арнайы әскери операция кезінде Усама бен Ладеннің ұлы оққа ұшты

2 344 просмотра


"Әл-Қаида” террористік ұйымының негізін қалаған Усама бен Ладеннің ұлы Хамза бен Ладенді арнайы операция кезінде атып өлтірген деп хабарлады сенбі, 14 қыркүйекте Ақ үй.

"Әл-Қаида” ұйымына жетекшілік еткен Хамза бен Ладен Пәкістан мен Ауғанстан шекаралары маңындағы аумақта қаза тапқан. АҚШ президенті Дональд Трамп жариялаған мәлімдемеде оқиғаның қашан болғаны айтылмайды. Операцияның толық жай-жапсары да жазылмаған.

Мәлімдемеде бен Ладен ұлының өлімі "Әл-Қаида” ұйымының күш-қуатын әлсіретіп, өзге террористік топтармен байланысын азайтпақ деп көрсетілген.

Америкалық БАҚ Хамза бен Ладеннің қаза тапқанын әкімшіліктегі белгісіз ақпарат көзіне сілтеме жасай отырып, тамыз айында хабарлаған еді.

Бұған дейін АҚШ мемлекеттік департаменті жас шамасы отыздан енді асқан Хамза бен Ладен "Әл-Қаида" ұйымындағы әкесінің орнын басуды көздеп отыр деп мәлімдеген. Осыдан кейін АҚШ билігі биыл ақпанда оны ұстауға көмектесетін ақпарат үшін миллион доллар сыйақы тағайындаған.

Мұның алдында Хамза бен Ладен интернет арқылы аудио және видео үндеу жариялап, АҚШ-қа шабуыл жасауға шақырған.

АҚШ-та Усама бен Ладенді 2001 жылы 11 қыркүйекте болған терактіні ұйымдастырды деп санайды. Бұл терактіден шамамен үш мың адам қаза тапқан. Усама бен Ладеннің  өзін АҚШ-тың арнайы жасақ өкілдері 2011 жылы мамыр айында Пәкістанда атып өлтірген болатын.

Дереккөз: Азаттық радиосы



15 қыркүйек 2019, 09:22

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы мақала тақырыбына қатысты ой-пікіріңізбен бөлісіп, бейнежазба жолдағыңыз келсе, WhatsApp +7 771 37 800 38 нөміріне және editor@azh.kz поштасына жібере аласыз.