Атырауда полицейлер өткен жылдың желтоқсан айынан бері Шымкентте қарақшылық жасады деген күдікпен іздестіріліп жатқан 17 жастағы Қызылорда тұрғынын ұстады.
Қылмыс жасағаннан кейін оңтүстіктің тумасы батысқа бет алып, ақыр соңында осы жерде ұсталды. Ал осы уақытта оған мемлекетаралық іздеу жарияланған екен. Өйткені, ТМД елдерінің бірі Өзбекстанда жасырынып жүрген болуы керек деген жорамал болған.
- Күдікті қамауға алынды. ҚР ҚК-нің 192-бабы (Қарақшылық) бойынша сотқа дейінгі тергеу жұмыстары жүргізілуде, - деп хабарлады Атырау облыстық Полиция департаментінің баспасөз қызметінде.
«Мемлекетаралық» іздеу – ТМД елдерінде, ал «халықаралық» іздеу – басқа елдерде екенінін түсіндіре кеткен артық болмас. Атырау полициясында мемлекетаралық статистика бойынша бәрі жақсы: өткен жылы 88, ал биылдан бастап 23 қашқын ұсталған.
Фархат ӘБІЛОВ