Өзен суы 14 адамның өмірін қиды

1 қыркүйекте облыстың су қоймаларына шомылу маусымы аяқталды. Облыстық судан құтқару қызметі судағы қайғылы оқиғаларды және судан құтқару статистикасын келтірді.

2012 жылдың жазында 14 адам суға кетті: 8-і Атырауда, 2-і Махамбет, 2-і Құрманғазы және 2-і Жылыой аудандарында. Осынау азалы тізімге 3 маусымда Махамбет ауданы Бейбарыс селосының маңында өзенге құлаған «Нива» автокөлігінен шыға алмай қалған 5 жас жігіттің өлімі енген жоқ. Судан құтқару қызметіндегілер хабарлағандай, бұл жайт жол-көлік оқиғасы ретінде тіркелген.    

Судан құтқару қызметінің жұмысшылары 13 адамды судан құтқарған. Әсіресе олар орталық көпірді мұқият бақылауға мәжбүр. Осы жазда жастар одан 3 рет секірген: бір қыз бала өз-өзіне қол жұмсамақ болса, екінші қыз бәстескен және анықталмаған себеппен тағы бір жігіт секіріпті. Бәрі де тірі қалды.

Мұрат СҰЛТАНҒАЛИЕВ