Қабілетіңді дәлелде!

«Кезектен тыс аттестация нәтижесінде Атырау облыстық экономикалық және сыбайлас жемқорлық қылмыспен күрес департаментінің жеке құрамы 20 пайызға жаңартылды», - деп хабарлайды ведомоствоның баспасөз хатшысы Алтынай МҰХТАРОВА.

Жалпы қаржы полициясының 110 қызметкері кезектен тыс аттестациядан өтті. Естеріңізге салсақ, жоғары аттестациялық комиссияның ұсынысы бойынша департамент бастығының 2 орынбасары қаржы полициясы органынан шығарылды.

Тағайындау және жұмыстан шығару Агенттік номенклатурасының құзырына кіретін департаменттің 11 қызметкері Орталық аттестациялық комиссияның сынағынан өтті.

Аттестация нәтижесі бойынша 7 қызметкер атқарып отырған лауазымдарына лайықты деп танылды. 3 қызметкер лауазымына лайықсыз деп танылып, төмендетуге ұсыныс берілді. 1 қызметкер лауазымына лайықсыз деп танылып, қаржы полициясы органынан шығаруға ұсыныс жасалды.

Аймақтық аттестациялық комиссияда қаржы полициясының 95 қызметкері аттестациядан өтті. Нәтижесінде 73 қызметкер лауазымды орындарына сай деп бағаланды. 3 адам лауазымына лайықты деп танылып, лауазымын жоғарылатуға, ал 6 адам сынақтан өте алмағандықтан, лауазымдарын төмендетуге ұсыныс берілді. Тағы 6 адам лауазымдарына сай келмей, басқа қызметке ауыстыруға ұсыныс жасалды. Атырау қаржы полициясының 7 қызметкерін жұмыстан шығаруға ұсыныс берілді.

Тамара СУХОМЛИНОВА