25 маусымда Атырауда жағажайдан тыс жерде шомылып жүрген 23 жастағы жігіт Жайыққа батып кетті. Денесі бір сағаттан кейін судан шығарылды. Ал 1 шілдеде жағажайдан тыс жерде шомылып жүріп 42 жастағы қала тұрғыны өзенге батып кетті. Денесі 3 шілдеде табылып, судан шығарылды.
***
29 маусымда кешкісін Мақат ауданында Атырау-Досор жолында MitsubishiRosa маркасындағы көлік өртеніп кетті. Келесі күні Индер-Атырау жолында NissanTerrano өртеніп кетті, ал 1 шілдеде Атырауда «Тамаша» сауда-ойын сауық орталығының жанында «Лада Калина» лаулап жана бастады. Құрбандар мен зардап шеккендер жоқ.
***
«Допинг» шарасы барысында атыраулық полицейлер 4 емдеу мекемесі мен 13 дәріхананы тексерді. Атырау облыстық ІІД баспасөз хатшысы Назымгүл Қайсағалиева хабарлағандай, 6 дәріханада құрамында есірткілік заты бар препараттар рецептсіз сатылған. Бұдан басқа, №1 емханада ҚР Әкімшілік құқық бұзушылық туралы кодексінің 464-бабына («Лицензиялау нормаларын бұзу») сай келетін заң бұзушылықтар анықталды. Барлық осы фактілер бойынша әкімшілік іс қозғалды.