Аудан жаңалықтары

ИСАТАЙ АУДАНЫ

Исатай аудандық ауыл шаруашылығы бөлімінің басшысы Қадыржан ЕРМҰХАНОВТЫҢ айтуынша, әр апта сайын ұйымдастырылатын ауыл шаруашылық жәрмеңкесінде әртүрлі тауарларды көруге болады. Сондай-ақ, бір ісек қой 30 мың теңгеге, тұсақтар 20-23 мың теңге аралығында сатылуда. Ал сиыр және жылқы еттерінің 1 келісі 1 200 теңгеге, түйе еті 1 000 теңгеге сатылуда.

* * *

Жанбай ауылында екі қабатты 200 орындық мәдениет үйінің құрылысы басталды.

Онда саз мектебі, кітапхана үшін де орын болады.

* * *

Аққыстау поселкесінде 160 орындық балабақшаның, ал, Х. Ерғалиев ауылында 100 орындық балабақшаның құрылыстары аяқталуға жақын.

Балабақшалар КТК, «Қазмұнайгаз» компанияларының демеуқаржысына салынып жатыр. Ата-аналар балаларының балабақшаларға қабылдануын асыға күтуде.

* * *

МАХАМБЕТ АУДАНЫ

Махамбет ауданында тазалық айлығы жүріп жатыр.

Мекеме қызметкерлері қоқыстарды жинаумен бірге ағаш түптерін әктеу жұмыстарымен айналысуда. Олар Жайық жағасының тазалығына да үлкен мән беріп отыр.

Ләззат ҚАРАЖАНОВА