В Атырау +3 
28 қаңтарда ертемен Химпоселкеде теміржол өткелінің маңында жол жиегінде тоқтап тұрған «Лада-Калина» көлігі «Батыс» мобильдік полиция тобының назарын аударды.
Көлік ішінде Құрманғазы ауданының Сүйіндік ауылының 1993 жылғы және 1994 жылғы төрт тұрғыны болған. Ал жүксалғыштан полицейлер КамАЗ-дың 4 аккумуляторын тапқан. Жастар көп бұлтақтамай, бірер сағат бұрын бұл аккумуляторларды түрлі-түсті металлдар қабылдайтын орынға тапсыру үшін жүк көліктерінен түсіріп алғандарын мойындады.
- Төртеуі де ұсталды, ҚР ҚК-нің 188-бабы («Ұрлық») бойынша қылмыстық іс қозғалды, - дейді Атырау қалалық ІІБ бастығының орынбасары Марат ТАҒАНИЯЗОВ. – Соңғы екі айда қаладан 12 көлік аккумуляторы ұрланған. Сондықтан ұсталушылардан осы қылмыстарға қатыстылығы жөнінде жауап алынуда. Бұлтартпау шарасын таңдау туралы мәселе шешілуде.
Тамара СУХОМЛИНОВА