Жапонияда 200 мыңға жуық отбасы сусыз қалды

Жапонияда күннің күрт суытуынан су құбырлары істен шығып, 189 мыңға тарта отбасы сусыз қалды, деп хабарлайды РИА-Новости.

Тұрғын үй-коммуналдық шаруашылығының нысандарындағы апат Кюсю, Сикоку мен Хонсю аралдарында орын алды. Қазір өзін-өзі қорғау күштері халыққа қолғабыс етуде.

Киодо агенттігінің хабарлауынша, Миядзаки префектурасындағы Эбино қаласында су құбыры қатты аязға шыдас бермей, жарылып кеткен. Қала билігі дереу өзін-өзі қорғау күштерінен көмек сұрады.

Екі күн ішінде Жапонияда суықтан сегіз адам мерт болып, 610-ы жарақат алған. Ауа райының қолайсыздығы көлік қозғалысын қиындатып отыр, кейбір ішкі әуе рейстері тоқтатылған.

Дереккөз: bnews.kz