​Бекіре мен уылдырық өртелді

Сурет "АЖ" мұрағатынан алынды 28 желтоқсанда «Вест Дала» компаниясының пешінде 2032 келі бекіре тұқымдас балық пен 25,8 келі қара уылдырық жойылды.

– «Тамақ өнімдерінің қауіпсіздігі туралы» ҚР Заңының 5-бабына сәйкес, алдын ала біздің зауыттың, қалалық ветеринария бөлімінің, тұтынушылар құқығын қорғау басқармасының, табиғат қорғау прокуратурасының, ІІД және экология департаментінің қызметкерлерінен комиссия құрылды, - дейді «Жайық-Атырау бекіре өсіру зауыты» РМКК бас инженері Әділгерей ҚАЙРАЛАПОВ. – Бұл балық өнімдері 2014 жыл бойына браконьерлерден тәркіленіп, сақтау мерзімінің өтуіне байланысты жойылды.

Біз ҚР балық шаруашылығы комитеті төрағасының орынбасары Нариман ЖҮНІСОВПЕН хабарласқан едік. Ол былай деп хабарлады:

– «Жануарлар дүниесiн қорғау, өсiмiн молайту және пайдалану туралы» ҚР Заңының 11-1 бабына сәйкес, мемлекеттік монополия субъектісі өткізетін өнімнің бағасын монополияға қарсы органмен келісу бойынша уәкілетті орган (ауыл шаруашылығы министрлігі) белгілейді. Мемлекеттік монополия субъектілеріне (яғни, Жайық-Атырау бекіре өсіру зауыты) арналған бағалар таяу күндері ғана бекітілді, тиісті бұйрық шықты. Сондықтан бұдан бұрын браконьерлерден тәркіленген бекірелер мен уылдырықты зауыт өткізе алмайтын еді. Ал енді өткізе алады.