Головкиннің Нью-Йорктегі жеңісі: көзкөргеннің әңгімесі

Қазақстандық Геннадий Головкин мен канадалық Давид ЛЕМЬЕ арасындағы аңызға айналған айқас Нью-Йоркте көптеген қазақстандықтардың басын қосты. Араларында ұлы спортшының атыраулық жанкүйерлері де бар екен. Солардың бірінен атақты Madison Square Garden алаңында сол күні қалыптасқан ауан туралы айтып беруін өтіндім.

Кеше, жексенбілік таңда Қазақстан халқы «бөрігін аспанға лақтырып» қуанды. Сол уақытта, бірақ Нью-Йорк уақыты бойынша түнгі 2-де Головкиннің Лемьені жеңген жағдайда өз жанкүйерлері үшін таңға дейін арнайы жалдап алып қойған Манхэттендегі «Урбан» түнгі клубында бір топ қазақстандықтар «тойлап» жатты. Жолы болғандардың арасына бірнеше атыраулық жанкүйерлер тап болды.

- Клубқа кіргісі келген көп ішінен тек 150-ге жуық адам кіре алды, біздің жолымыз болып кетті, - дейді жерлесіміз Нұрлан ЖОЛБОЛОВ. - Әлі сене алар емеспін: Манхэттен және зал толы қазақстандықтар, қазақ музыкасы жүріп жатыр, барлығы Генаның жеңісіне масаттанып, шынайы бақытқа кенелгендей. Мүлдем танымайтын адамдар - американдықтар және тағы басқалары бізбен амандасып, құттықтап жатыр, алайда сөздерінен қызғаныш, тіпті көреалмаушылық та сезіледі. Қазір мұнда біздікілер өте-е көп, олар Американың әр түкпірінен ғана емес, әсіресе Лос-Анджелес пен Флоридадан келген студенттер көп, Қазақстаннан Геннадидің осы айқасы үшін әдейілеп келгендер де жетеді.

- Айқас кезінде залда не болып жатты?

- Мэдисон Сквер Гарден – аңызға айналған арена, мұнда Мұхаммед Әли, Тайсон, Фрезер сияқты ұлы спортшылар жұдырықтасты... Айқасқа кіру билеті рингке жақындығына қарай 100 доллардан 8 000 долларға дейін жетті. Алайда 18 200 адам сыятын залда ине шаншыр жер болған жоқ. Залдағы ауан айқастың басынан бастап ширығып тұр еді, алайда 4 раундтан бастап шарықтау шегіне жетті: адамдар айқайлап қана қоймады, шыңғырды, бақырды, гуілдеді, өлді, кері тірілді...

- Геннадиді қолдаушылар көп болды ма?

- Геннадий АҚШ-та өте әйгілі, оның американдық жанкүйерлері өте көп. Сондықтан залда Генаны тек қазақстандықтар ғана қолдаған жоқ, меніңше, зал екіге бөлінген сияқты.

Естеріңізге салсақ, 18 қазанда Нью-Йоркте Геннадий Головкин мен Давид Лемье арасында айқас өтті. Орта салмақта (72,6 келіге дейін) IBF және IBO нұсқалары бойынша әлем чемпионы, WBA нұсқасы бойынша әлемнің «суперчемпионы», сондай-ақ WBC нұсқасы бойынша әлем чемпионы атақтары сарапқа салынды. Айқасты 8-раундта мерзімінен бұрын техникалық нокаутпен ұтқан Головкин осы титулдардың барлығын алды. Ол 34 айқас өткізіп, 34 жеңіске жетті.

Зульфия БАЙНЕКЕЕВА