Оқиғалар тізбегі

Полиция қызметкерлері 23 жастағы Атырау қаласы тұрғынын ұстады. Ол үстіміздегі жылдың тамыз айында Самал ықшамауданында тұратын 50 жастағы әйелдің коттеджіне кіріп, жалпы сомасы 500 мың теңгеге жуық қолма-қол ақша мен зергерлік бұйымдарды ұрлаған. Тергеу жүріп жатыр.

* * *

Дамбыдағы Атырау ауылындағы жеке үй ауласынан «Стелс» велосипедін ұрлағандар анықталды. Великті көрші Амангелді ауылының 10 және 12 жасар тұрғындары ұрлапты.

* * *

Полиция бұдан жарты жыл бұрын Алмалы ауылының көшесінде тұрған КамАЗ-дің 45 мың теңге тұратын аккумуляторын ұрлаған Атырау қаласының 57 жастағы тұрғынын ұстады.

* * *

Полиция Атырау қаласының 26 жастағы тұрғынын ұстады. Ол маусым айында Құрманғазы ауданы Ақкөл ауылындағы салынып жатқан үйден 10 жылыту радиаторы мен темір есік ұрлады деп күдіктелуде.

* * *

«Бекіре» операциясының күзгі кезеңі барысында Ганюшкино ауылындағы Шарон өзенінде моторлы қайыққа мінген 58 жастағы жергілікті тұрғын ұсталды. Оның қайығынан бір қап қара балық және 11 бекіре табылды.

* * *

Қырық жастағы әйел интернет арқылы келбетті ер адаммен танысады, ал кездесу кезінде жігіт күш көрсетіп, оның «Самсунг» ұялы телефонын тартып алады. Әйел полицияға хабарласып, 28 жастағы күдікті ұсталды.

* * *

25 және 27 қыркүйек аралығында Атырау қаласында «Мас жүргізуші – қылмыскер!» операциясы жүрді. 19 мас жүргізушімен бірге 9 адам рульде телефонмен сөйлескені, 11-і жылдамдықты арттырғаны, 11-і қарсы жолаққа шыққаны үшін ұсталды.

* * *

Қылмыстық істер бойынша мамандандырылған ауданаралық сот азамат А.Ш.-ны заңсыз есірткі заттар сатқаны үшін кінәлі деп таныды. 2015 жылдың ақпанында ол 3 грамм қарасораны 5 мың теңгеге сатып жатқан жерінен ұсталды. Пәтерін тексергенде тағы 35,9 грамм табылды. Үкім – дүние-мүлігі тәркіленіп, 5 жыл бас бостандығынан айырылды.