Соңғы жылдары Атырау облысында анықталған жалған кәсіпкерлік фактісі 10 есеге көбейді.
Егер өткен жылы үш қылмыс тіркелген болса, биыл олардың саны 30-ға жетті. Мемлекеттік кірістер департаментінің көлеңкелі экономикаға қарсы іс-қимыл басқармасының басшысы Асхат ҚАСИМОВТЫҢ айтуынша, ҚР мемлекеттік кірістер комитеті құрылу кезеңінде жасанды (араққұмар, нашақор, бұрын сотталған) тұлғаларға тіркелген кәсіпорындарды анықтауға мүмкіндік беретін дерекқор жасақталды. Бұдан басқа, заңды тұлғаларды «қолма-қол» операцияларды жасау тәуекеліне жатқызу критерийлері жасақталды, яғни, қызметкерлер, материалдық-техникалық база және басқа қажетті жағдайларсыз үлкен айналымдар бар болса, бірақ салық міндеттемесі орындалмаса.
"АЖ" АНЫҚТАМАСЫ:
Жалған кәсіпкерлік – кәсіпкерлік қызметті жүзеге асыру ниетінсіз коммерциялық ұйым құру. Ол несиелер алу, салықтан босатылу, бөгде мүлік пайдасын көру немесе тыйым салынған қызметті бүркемелеу мақсатында жүзеге асырылады.
Жалған кәсіпкерлік 2 000 айлық есептік көрсеткішке дейінгі мөлшерде айыппұлмен немесе сол мөлшердегі түзету жұмыстарымен, немесе екі жылға дейінгі мерзімде бас бостандығын шектеумен, немесе сол мерзімде бас бостандығынан айырумен жазаланады.
Зульфия ИСКАЛИЕВА