В Атырау -10 
Алты адамның өмірін жалмаған жол-көлік оқиғасына («Жылыой ауданында орын алған ЖКО-да Өзбекстанның алты азаматы қаза тапты») кінәлі жүргізуші 7 жылға бас бостандығынан айыру жазасына кесілді.
Облыстық соттың баспасөз қызметі хабарлағандай, Жылыой аудандық сотының А.НҰРҒОЖИЕВҚА қатысты үкімі жарияланды.
«2015 жылдың 19 мамырында Доссор-Бейнеу тас жолында «КамАЗ-5511» маркалы көлігін басқарып келе жатқан жүргізуші А.Нұрғожиев алдында кетіп бара жатқан көлікті басып озып, қарсы жолаққа шығып кетіп, «Лада-Ларгус» маркалы көлігіне соқтығысқан», - делінген баспасөз хабарламасында. Апат салдарынан «Лада-Ларгустағы» алты адам қаза болды. Тек ауыр жарақат алған бір жолаушы ғана тірі қалды. Сот жеңілдететін мән-жайды және сотталушының өкінішін ескеріп, 5 жыл мерзімге көлік құралын басқару құқығынан айырып, бар болғаны 7 жылға бас бостандығынан айыру түрінде жаза тағайындады. Үкім әлі заңды күшіне енген жоқ.
Сәуле ТАСБОЛАТОВА