​Жастарға арналған үй

7 тамызда Атырау облысының әкімі Бақтықожа ІЗМҰХАМБЕТОВ жергілікті «Жас Отау» бағдарламасы бойынша пәтер алған жас отбасыларға кілттер табыс етті.

- Бұл - біздің бірнеше жыл бұрын бастаған «Жас Отау» бағдарламасы бойынша беріліп жатқан алғашқы үй. Бағдарлама жалғасын табады, келесі жылы бағдарлама бойынша 120 пәтерлік үй беруді жоспарлап отырмыз, - деп хабарлады әкім.

Нұрсая ықшамауданындағы жаңа үй жұбайлардың жастары 29-дан аспаған жас отбасыларға арнап салынды. Үйде бір бөлмелі 60 пәтер және екі бөлмелі 30 пәтер бар. Тұрғын үйлерді бөлу комиссиясы мүшелерінің бірі Ұлықбек ТІНАЛИЕВТІҢ айтуынша, 1 400 өтінім келіп түскен, осылардың 700-ге жуығы ғана белгіленген талаптарға сәйкес келді. Солардың ішінен алғашқы 90 бақытты отбасы пәтерге ие болды. «Жас Отау» бағдарламасы бойынша тұрғын үй алуға үміткерлер көптеген талаптарға сай болуы керек: жұбайлардың жасы 29-дан аспауы, жиынтық кіріс 100 мың теңгеден кем емес және 350 мың теңгеден аспауы қажет. Пәтерлерді бөлу бірнеше санаттар бойынша жүргізілді: жұбайлардың біреуі немесе екеуі де мүгедек; мүгедек балалары бар отбасылар; жұбайлардың бірі немесе екеуі де өз салаларында – спортта, өнерде, кәсіби қызметінде – қоғамда белгілі бір танымалдылыққа қол жеткізгендер. Үміткерлердің келесі санаты – бюджет қызметкерлері мен мемлекеттік қызметшілер, соңғысы – басқа да кезекте тұрғандар.

- Алдымызда тең адамдар арасынан лайықтысын таңдау сияқты өте қиын міндет тұрды, - дейді Ұ. Тінәлиев. – Кейбіреулердің жалақылары жетпеді, алайда оларға ата-аналары көмекке келді, олар тұрғын үй несиесін ресімдегенде кепілгер болды. Өйткені осы бағдарлама бойынша алға қарай үйлер салу қайтарымды қаржымен жүргізілетін болады.

Зульфия ИСКАЛИЕВА

Суретті түсірген автор