Оқиғалар тізбегі

29 мамыр күні кешкісін Канцев көшесінде полиция қызметкерлері өзін күдікті ұстаған 29 жастағы Балықшы тұрғынын ұстады. Наркологиялық диспансерде ұсталған тұлғаның есірткі пайдаланғанын растады.

***

Полицияға әйел адам шағымданды: наурыз айында Исатай ауданының 26 жастағы тұрғыны одан қарызға 150 мың теңге алып, әлі күнге қайтармай жүр екен. Күдіктіге іздеу жарияланды.

***

Қаланың жас тұрғыны полицияға өткен жылдың қазан айында Атырау қаласының 36 жастағы тұрғыны жиһаз жасап беруге уәде беріп, одан 750 мың теңге алып, ұшты-күйлі жоғалып кеткеніне шағымданды. Күдікті ұсталып, уақытша тергеу изоляторына қамалды.

***

Полицияға әйел адам хабарласып, қаңтарда 55 жастағы кәсіпкердің кеңсесіне жөндеу жұмыстарын жасап беруге келіскенін хабарлады. Әйел өз жұмысын орындаған, ал тапсырыс беруші оған 720 мың теңгесін төлемеген. Күдіктіге іздеу жарияланды.

***

Полицияға зейнеткер хабарласып, 32 жастағы танысының 9 жыл бұрын оның атына 236 мың теңгеге несие ресімдеп, әлі күнге дейін төлем жүргізбегеніне шағымданды. Күдікті іздестірілуде.

***

Құрманғазы ауданы Сүйіндік ауылының 49 жастағы тұрғынының үйінен тіркелмеген екі аңшы қаруы табылды. Қару сараптамаға жіберілді.

***

29 мамырға қараған түні Дамбы ауылының 30 жастағы тұрғынының ауласынан «Лада» ВАЗ-2112 автокөлігі ұрланған. Келесі күні таңертең көлік Пешной түбегінен табылған. Тергеу жүруде.

***

30 мамыр күні кешке жағалауда 18 жастағы төрт жас заң талаптарына бағынбай, ішкі әскердің екі сарбазын соққыға жыққан. Бұзақылар уақытша тергеу изоляторына қамалды.

***

31 мамыр күні таңертең Геологтағы СТО маңында ВАЗ-2121 автокөлігін тексеру барысында поселкенің үш тұрғыны жол-патруль қызметінің қызметкерлеріне қарсылық көрсеткен. Бұзақылардың бірі өткір затпен полицияға тиесілі «Шкода Октавия» көлігінің дөңгелегін тесіп жіберген. Ол уақытша тергеу изоляторына қамалып, қалғандары басқа жаққа кетпеу туралы қолхатпен босатылды.

***

Жылыой АІІБ-не Құлсары қаласының 60 жастағы тұрғыны шағымданды: жарты жыл бұрын оның 45 жастағы танысы банктен оны 100 мың теңге көлемінде несие алуға көндіріп, содан бері төлем жүргізбеген. Күдікті іздестірілуде.

***

30 мамырға қараған түні Ганюшкино селосында 30 жастағы жергілікті тұрғын дүкеннің терезесін сындырып, ішінен 2 мың теңгенің азық-түлігін ұрлаған. Күдікті ұсталды.