​ҰБТ әр жерде өтетін болды

Биыл Исатай ауданының мектеп бітіруші түлектері ҰБТ-ны тапсыру үшін 100 шақырым қашықтағы қалаға қатынайтын. Бұл оқушылар мен ата-аналардың ғана емес, сонымен қатар мұғалімдердің де ренішін туғызып жүрді.

Оқушылар ҰБТ-ны бастапқы 2 жылда Құрманғазы ауданына барып, кейінгі 9 жылда Атырау қаласына барып тапсыруға мәжбүр болды. Себебі, аудан бойынша ҰБТ тапсыруға арнайы жабдықталған мектеп болмаған.

Бірақ, енді Білім министрлігінің осы жылдың 4 наурыздағы ҰБТ тапсыру орталығы барлық пункттерде ашылсын деген №100-ші бұйрығы исатайлықтарды қуантып тастады. Сөйтіп, Аққыстаудағы Абай орта мектебін ҰБТ тапсыру орталығы етіп жабдықтайтын болып шешілді. Биыл аудан бойынша 200-ден астам түлек ҰБТ тапсыруға дайындалуда.

- Мектепті жабдықтау, маман даярлап, күтіп ұстап тұру үшін бұрын қаржы республикалық негізде шешіліп келген болатын. ҰБТ орталығын ашу үшін енді ақша жергілікті бюджеттен бөлінетін болды, - деп хабарлайды Исатай ауданы әкімінің орынбасары Мәди ӨТЕҒАЛИЕВ. - Бүгінде облыстан қажетті 9 млн 600 мың теңге бөлінді. Оның 7 млн теңгесі құрал-жабдықтар алуға кетеді. Биыл ҰБТ-ні өзімізден өткізуге күш салудамыз. Алайда мердігерді іздеу уақыт алады. Егер үлгермесе, келесі жылы ҰБТ тапсыру орталығы міндетті түрде ашылатын болады.

Ләззат ҚАРАЖАНОВА