Спорт жаңалықтары

Америкадан келген қола жүлде

Американың Колорадо-Спрингс қаласында грек-рим күресінен «Дейв Шульц мемориалы» XVI халықаралық турнирі өтті.

Қазақстан құрамасының қоржынына екі күміс және екі қола жүлде түсті. Қазақстандық «қола» жүлделердің біреуін атыраулық спортшы Илья Насточенко жеңіп алды.

Илья – 2010 жылғы жастар арасындағы Азия чемпионы. Оны Батырбек Баймұратов (4-БЖСМ) жаттықтырады.

***

Көршілерге барып, көп жүлде алды

3-БЖСМ және 4-БЖСМ грек-рим күресі командасы Батыс Қазақстан облысының ашық чемпионатына қатысып, сәтті өнер көрсетті.

4-БЖСМ шәкірттері Фархад Ғимранов (120 келіге дейін) пен Ілияс Есенжанов (100 келіге дейін) чемпион атанса, Руслан Жұмабеков (96 келіге дейін) пен Айбек Рахатов (50 келіге дейін), сәйкесінше, күміс және қола жүлдеге ие болды.

3-БЖСМ шәкірттерінің қоржынында бір «күміс» және екі «қола» медаль бар. Жүлдегерлер - Андрей Водиниктор (76 келіге дейін), Нұркен Дүйсенғалиев (74 келіге дейін) және Шамиль Халухаев (56 келіге дейін).

***

Абылайдың үлесі

Алматыда ерлер мен әйелдер арасында спорттық және әскери самбодан Әлем кубогы өтті.

Жарыстарға 17 елдің үздік палуандары қатысты. Жүлделер есебі бойынша Қазақстан құрамасы Ресейден кейін командалық екінші орынға ие болды. Бұл жетістікке атыраулық 1-БЖСМ шәкірті Абылай Төлеш те өз үлесін қосты. Ол 62 келіге дейінгі салмақта төрт жеңісті белдесу өткізіп, ақтық сында ресейлік спортшыға есе жіберіп қойды.

***

Командалық жеңіс

Астанада 1999-2001 ж.т. ер балалар мен қыздар арасында дзюдодан «Бастау» спорт клубының жүлдесі үшін халықаралық турнир өтті. Жарысқа Ресейден, Тәжікстаннан және Қазақстанның барлық облыстарынан 34 палуандар командасы қатысты.

Алғашқы күні командалық жарыс болды. Атырау қаласының құрамасы «Астана Гренада» командасын (9:1), «Семей» (9:1) және «Астана батыр» (7:3) командаларын ұтты, алайда ширек финалда Степногорск қаласы құрамасынан 4:5 есебімен ұтылып қалды. Содан кейін Қарағанды құрамасы (10:0) және Павлодар командасын (8:2) жеңді. 3-орын үшін болған матчта біздің жігіттер степногорлықтарды 8:2 есебімен ұтып, есе қайтарды.

Екінші күні жеке есепте белдесулер өтті. 34 келіге дейінгі салмақта атыраулық Дулат Аманқосов барлық қарсыластарын «иппон» әдісімен ұтып, алтын медальға ие болды. Өз салмақ дәрежелерінде Ақылбек Матаев, Ермек Амангелді, Исатай Абаев күміс жүлде ұтса, Жәнібек Тельман, Серікболсын Шынтас, Бексұлтан Ақсисенов және Тілекші Дүйсенова қола медаль алды.

***

Тартысты бәсеке

Төтенше жағдайлар министрлігінің спартакиадасына дайындық аясында ТЖД бөлімшелері қызметкерінің арасында үстел теннисінен, шахмат пен волейболдан облыстық біріншілік өтті.

Үстел теннисінен жарыс төрт жас ерекшелік тобында өткізілді: 30 жасқа дейін, 30-35 жас, 35-40 жас және 40 жастан жоғары.

Өз жас ерекшелік топтарында «Өрт сөндіруші» филиалының қызметкері Жансерік Есенов, «Өрт сөндіру және апатты-құтқару жұмыстары қызметі» ММ қызметкерлері Аян Берғалиев пен Бақытбек Салықов, облыстық ТЖД аппаратының қызметкері Марат Дәуітов жеңімпаз атанды.

35 жасқа дейінгі топта өрт сөндіру қызметінің шебері Қ. Сақтағанов департаменттің үздік шахматшысы атанды. 35 жастан жоғары топта екі жеңімпаз болды – ТЖД басшысының орынбасары Марат Құрманов және өрт сөндіру техникасы бөлімінің басшысы Нұрлан Нұралин.

Волейболдан жарыста 1-орынды өрт сөндіру қызметі командасы алса, 2-орынды «Ақ Береннің» мұнай атқылауына қарсы қызметі, 3-орынды облыстық ТЖД аппаратының командалары иеленді.

***

«Атыраудағы» айқас

«Атырау» ДСК-нде ММА-дан (аралас айқас) ашық облыс чемпионаты өтті.

1996-97 ж.т. жастар арасындағы жеңімпаздар: 55 келіге дейін – Құдайберген Қуанышқали, 60 келіге дейін – Шыңғыс Жайсақ, 65 келіге дейін – Джахар Шафхатов, 70 келіге дейін - Аманбек Шершеналиев, 77 келіге дейін – Думан Балмұханов.

Ересектер арасында: 60 келіге дейін – Алпамыс Әдиятов, 65 келіге дейін – Нұрбек Отар, 70 келіге дейін –Азамат Каштенбай, 77 келіге дейін - Исатай Теміров, 84 келіге дейін – Серікбай Шпанов, 84 келіден жоғары – Мирас Шынтасов.

Мұрат СҰЛТАНҒАЛИЕВ