В Атырау +22.1 
Жеңіс саябағынан Тұрғын үй қалашығы жағажайына дейінгі бағыт Атыраудың жаңа шеберлік жоспары (мастер-планы) аясында жүзеге асырылатын алғашқы жобалардың бірі болуы мүмкін.
Жаяу жүргіншілер көпірін, Тұрғын үй қалашығы саябағын және Ретросаябақты бірыңғай қоғамдық кеңістікке біріктіру ұсынылды.
Қаланы дамыту тұжырымдамасын Атырау облысының әкімі Болат Ақшолақов Астана қаласының Урбанистика орталығы және Қазақстан урбанисттер қауымдастығы өкілдерімен талқылады.
Мамандардың бағалауынша, негізгі жобаның бастапқы эскизін екі айда, ал экологиялық және жоба алдындағы талдауды шамамен үш айда дайындауға болады. Атыраудың орталық бөлігінің жалпы эскиздік пайымын әзірлеу алты айға жуық уақытты алады.
Ақшолақов билік өкілдеріне шеберлік жоспардың толық аяқталуын күтіп отырмау керектігін атап өтті. Онымен қатар басымдық берілген аумақтарды абаттандыру үшін эскиздер мен жобалық құжаттамаларды әзірлеуді бастау қажет деді ол.
Осындай аймақтардың бірі Жеңіс саябағын, жаяу жүргіншілер көпірін, Тұрғын үй қалашығы саябағын, Ретросаябақты және Тұрғын үй қалашығы жағажайын жалғайтын бағыт болуы мүмкін. Қатысушылардың пікірінше, бұл жобаны кезең-кезеңімен жүзеге асыруға болады, өйткені бұл учаскеде жасыл желектер мен қоғамдық кеңістіктер ішінара қалыптасып қойған.
Урбанистер сондай-ақ Атырауда елордалық тәжірибені қолдануды ұсынды. Мүмкін болатын шешімдердің қатарында — жағалау бойымен бірыңғай веложол-жаяу жүргіншілер бағытын құру, автокөлік қозғалысын шектей отырып бульварларды реконструкциялау, жаңбыр бақшаларын ұйымдастыру және су өткізетін төсемдерді қолдану бар.
Шеберлік жоспардың өзі Атыраудың таяудағы 5–10 жылға арналған дамуын айқындауы тиіс. Құжатқа инженерлік инфрақұрылым, қалалық кеңістік экономикасы және қоғамдық аумақтарды дамыту мәселелерін енгізу жоспарлануда.
Бұдан бөлек, көгалдандыру жарғысын әзірлеу мәселесі де талқыланды. Онда Атырау үшін ұсынылатын ағаш пен бұта түрлері, оларды отырғызу талаптары және әрі қарай күтіп-бөліп қарау ережелері бекітілуі мүмкін.
Кездесу қорытындысы бойынша Ақшолақов тұжырымдаманы жергілікті урбанистермен бөлек талқылауды тапсырды. Ол сондай-ақ ұсынылып отырған сәулеттік шешімдерді техникалық тұрғыдан жүзеге асыруға болатындай етіп, жобалау кезеңінде-ақ инженерлерді тарту қажеттігін меңзеді.