В Атырау +32.3 
Ақтаулық блогер Instagram желісінде қылмыстық іс бойынша жүргізілген тергеу әрекеттерінен түсірілген видеоны жариялаған. Бейнежазбада екі жәбірленуші де көрініс тапқан. Мұндай «контентке» келіспеген қала тұрғындары сотқа жүгінді.
Талапкерлер өздерінің түсірілім жасауға және видеоны жариялауға келісім бермегендерін мәлімдеді. Олардың айтуынша, әлеуметтік желіде тараған бейнежазба мен оның астындағы жағымсыз пікірлер толқыны салдарынан қатты күйзеліске түскен. Осыған байланысты олар видеоны өшіруді және моральдық зиян үшін өтемақы төлеуді талап етті.
Өз кезегінде блогер сотта өзін қоғамдық белсенді әрі штаттан тыс журналист екенін айтып ақталуға тырысты. Алайда Ақтау қаласының №2 соты бұл уәждерді қабылдамады. Сот Қазақстан Республикасы Азаматтық кодексінің 145-бабына сәйкес адамның бейнесін оның келісімінсіз пайдалануға тыйым салынғанын еске салды. Сондай-ақ жарияланған бейне заңда көзделген ерекшеліктердің ешқайсысына жатпайтынын атап өтті.
Нәтижесінде сот видеоны жариялауды заңсыз деп таныды. Блогер Instagram желісіндегі жазбаны толықтай өшіруге және әрбір жәбірленушіге моральдық зиянды өтеу ретінде 200 мың теңгеден, жалпы 400 мың теңге төлеуге міндеттелді.
Хабарланғандай, сот шешімі заңды күшіне енген.