В Атырау +24 
Қазақстанда 2026 жылғы 25 тамыздан бастап көлік құралын басқару құқығын тоқтатудың қолданыстағы себептеріне екі жаңа негіз қосылады. Бұл туралы Zakon.kz хабарлады.
Жаңа түзетулер «Жол жүрісі туралы» заңның 75-бабына енгізілді. Енді жүргізуші куәлігінен айырудың қосымша негіздері мынадай:
65 жасқа толған және мүгедектігі бар жүргізушілер екі жыл сайын міндетті медициналық тексеруден өтпесе, көлік жүргізу құқығынан автоматты түрде айырылады;
Мас күйінде көлік басқарғаны үшін қозғалған қылмыстық іс тоқтатылса да, жүргізуші сегіз жылға дейін көлік жүргізу құқығынан айырылады.
Бұған дейін мұндай шешім сот арқылы қабылданатын болса, енді Ішкі істер министрлігі құзыретіне беріледі. Медициналық қарсы көрсетілімдер туралы мәліметтер автоматтандырылған деректер базасына енгізіліп, рәсім алгоритмдік тәртіппен жүзеге асырылатын болады.
Сонымен қатар, заңға енгізілген өзгерістерге сәйкес, жүргізушінің денсаулығы көлік жүргізуге кедергі келтірсе немесе жол ережесін білу емтиханын тапсырмаса, басқару құқығы тоқтатылады. Бұрын қылмыстық іс тоқтатылған жағдайда жүргізушіге құқық қайтарылатын еді, ал жаңа тәртіп бойынша ол тек сегіз жылдан кейін, қайта медициналық тексеруден өтіп және емтихан тапсырған соң ғана көлік жүргізу құқығын қайта ала алады.
Бұл өзгерістер Қазақстандағы жол қозғалысы қауіпсіздігін арттыруға бағытталған.