В Атырау +24.2 
Перу елінде 5,5 магнитудалы жер сілкінісі болып, бір адам қаза тапты, тағы он адам жарақат алды.
АҚШ Геологиялық қызметінің (USGS) дерегінше, жер сілкінісінің эпицентрі Сикая қаласынан оңтүстік-батысқа қарай 2 шақырым жерде орналасқан. Ошақ тереңдігі – 10 км.
Ұлттық БАҚ хабарлауынша, қаза тапқан адам Хунин аймағының Чонгос-Бахо ауданында тіркелген. Тағы он адам түрлі жарақат алған.
Хунин аймағында бір медициналық мекеменің инфрақұрылымы зақымданды. Сонымен қатар Эль-Кармен Ана мен бала аймақтық ауруханасының балаларға арналған қарқынды терапия бөлімінде қабырғаларда жарықтар пайда болған.
Ұлттық төтенше жағдайлар комитеті (COEN) жер сілкінісінен кейін бірқатар аудандарда электрмен жабдықтау үзілістері болғанын хабарлады.
Жерасты дүмпулері ел астанасы Лимада және Уанкайо қаласында да сезілген.
Көптеген перуліктер әлеуметтік желілерде «күшті жер сілкінісін» сезгенін жазды. Қауіпсіздік мақсатында тұрғындардың бір бөлігі үйлерінен және басқа ғимараттардан эвакуацияланған.