В Атырау +24.2 
20 шілдеге қараған түні Мәскеу аймағы ұшқышсыз ұшу аппараттарының (ҰҰА) жаппай шабуылына ұшырады. Азаматтық және логистикалық инфрақұрылым нысандары соққыға жығылып, зардап шеккендер туралы хабарлануда, деп хабарлайды DW.
Мәскеу мэрі Сергей Собяниннің мәлімдеуінше, астаналық аймаққа қарай 400-ден астам пилотсыз аппарат ұшып келген. Билік өкілдері ҰҰА-ның басым бөлігі әуе қорғанысы күштерімен алыс шептерде бейтараптандырылғанын, ал 85 дрон Мәскеуге таяған кезде тікелей атып түсірілгенін алға тартуда.
Wildberries қоймалары мен мұнай базасындағы өрт
Биліктің дрондарды атып түсіргені туралы мәлімдемелеріне қарамастан, куәгерлер мен Telegram-арналар Мәскеу облысында көптеген жер қиратылып, кем дегенде бес ірі өрт ошағының пайда болғанын хабарлап жатыр.
Негізгі соққылар Подольск, Домодедово және Одинцово қалалық округтеріне тиген. OSINT-талдау мәліметтеріне сәйкес, мына нысандар шабуылға ұшырады:
Колединодағы Wildberries логистикалық орталығы (қызметкерлерді шұғыл эвакуациялау жүргізілді, таңға қарай жұмысшылар орындарына қайта оралды);
Подольскінің Львовский шағын ауданындағы мұнай базасы;
Мотовиловодағы «Гривно» өнеркәсіптік паркі;
Домодедоводағы «Южные врата» индустриалды паркі (мәліметтер бойынша, ең қатты өрт осы жерде тіркелген).
Сондай-ақ, Истра маңындағы Алексино ауылында орналасқан Wildberries тапсырыстарды беру пунктінде де түнде қызметкерлерді эвакуациялау шаралары жүргізілгені хабарланды.
Тұрғын үйлердің қирауы және зардап шеккендер
Мәскеу облысының губернаторы Андрей Воробьевтің айтуынша, ҰҰА сынықтарының құлауы салдарынан бірнеше жеке үй өртеніп, зақымдалған. Astra және «Карты и стрелочки» Telegram-арналары Подольск пен Домодедовода пилотсыз аппараттардың көпқабатты тұрғын үйлерге соғылғанын жазады.
Ресми деректер бойынша зардап шеккендер бар: Домодедовода үй өртенген кезде бір адам жарақат алса, М-4 трассасында көліктің жанына дрон құлап, тағы бір адам зардап шеккен. Бұған қоса, Домодедово ауруханасы мина-жарылыс жарақаттарымен алты адамның ауруханаға жатқызылғанын мәлімдеді, олардың үшеуі — шетелдіктер (алайда аурухана бұл жағдайды ҰҰА шабуылымен тікелей байланыстырмады).
Ресейдегі логистикалық орталықтарға жасалған соққыларға қатысты бұған дейін Украина президенті Владимир Зеленский пікір білдірген болатын. Ол бұл әрекеттерді Ресейдің Украина инфрақұрылымына жасаған шабуылдарына қайтарылған жауап деп атап, Wildberries қоймаларында пилотсыз аппараттарға арналған бөлшектер сақталуы мүмкін екенін мәлімдеді.
Өз кезегінде, Ресей тарапы соңғы күндері Украинаның «Нова Пошта» логистикалық және пошта операторының Киев, Днепропетровск және Харьков облыстарындағы нысандарына бірқатар соққы бағыттаған еді.