В Атырау +31.2 
ExxonMobil танкері Қазақстан мұнайын тиеуге бара жатып КҚК терминалы маңында шабуылға ұшырады, деп хабарлайды КҚК.
Америкалық ExxonMobil компаниясы жалдаған Nordic Zenith танкері Қара теңіздегі Каспий құбыр консорциумының (КҚК) терминалына жақын жерде шабуылға ұшырады.
Консорциум дерегінше, кеме 17 шілде күні таңертең КҚК терминалында Қазақстан мұнайын тиеуді бастауы тиіс еді. Алайда шабуылдан кейін танкерде өрт шығып, ол жүктеуге жарамсыз болып қалған.
Танкер экипажы SOS белгісін берген соң консорциум күшімен 13 адам эвакуацияланды. Тағы 9 адам өз еркімен кемеде қалды. Sputnik Қазақстан хабарлауынша, кемеде қалғандар — Украина азаматтары, оларға төтенше жағдайда Ресей аумағына түсуге тыйым салынған.
Бұл оқиға Қазақстан мұнайының экспорттық күн тәртібі үшін маңызды, себебі КҚК терминалы — қазақстандық мұнайды әлемдік нарыққа жеткізетін негізгі бағыттардың бірі.
ExxonMobil — Қазақстандағы Теңіз кен орнын игеретін «Теңізшевройл» ЖШС‑нің акционерлерінің бірі әрі Қашаған консорциумына қатысушы.
Өткен аптада КҚК терминалы маңында америкалық Chevron компаниясына тиесілі Yasa Polaris танкеріне де шабуыл жасалған еді. Chevron да Қазақстандағы ірі мұнай‑газ жобаларына қатысады.
VesselFinder дерегінше, Nordic Zenith — 2011 жылы салынған Suezmax класындағы мұнай танкері. Ол Либерия туы астында жүреді, ұзындығы 274,4 м, ені 48 м, дедвейті 158,6 мың тонна. КҚК терминалына келер алдында танкер Стамбул маңындағы якорь тұрағында тұрған, 10 шілдеде шыққан. AIS жүйесінде межелі пункт ретінде КҚК көрсетілген.