В Атырау +31.2 
Қазақстан мен Әзербайжан көлік-логистикалық ынтымақтастықты жаңа деңгейге көтеріп жатыр. Екі ел Каспийде ірі бірлескен терминал салу және кемелер мен пойыздарды өзара жеткізу туралы келісті, деп хабарлайды Report.
Транскаспий халықаралық көлік бағытының (ТХКБ) өткізу қабілетін арттырудың жаңа қадамдарын Қазақстанның Әзербайжандағы елшісі Алим Байел мен AZCON басшысы Шахин Бабаев талқылады.
Алят портындағы жаңа терминал
Кездесудің басты нәтижесі — Әзербайжанның Алят портында бірлескен интермодалды жүк терминалын салу жоспарының бекітілуі болды. Аталған ауқымды жоба Бақу халықаралық теңіз сауда портының бас мастер-жоспарын жаңарту жұмыстары аяқталғаннан кейін бірден басталмақ. Жаңа терминал Еуропаға бағытталған қазақстандық жүктерді бірнеше есе жылдам өңдеуге мүмкіндік береді.
Астана үшін құрғақ жүк тасымалдаушы кеме, Баку үшін локомотивтер
Порт инфрақұрылымынан бөлек, дипломаттар кеме және локомотив жасау саласындағы өндірістік кооперацияны егжей-тегжейлі талқылады. Бұл бағытта елдер арасында ірі келісімшарттар жоспарланып отыр:
Қазақстан өзінің Каспий флотын күшейту үшін Баку кеме жасау зауытына екі заманауи құрғақ жүк тасымалдаушы кеме салуға ресми түрде тапсырыс беріп қойды.
Әзербайжан өз кезегінде теміржол паркін жаңарту үшін қазақстандық өндірістің локомотивтерін сатып алу мүмкіндігін қарастырып жатыр.
Дипломатиялық өкілдіктен атап өткендей, екі ел де соңғы уақытта халықаралық жүк тасымалдаушылар тарапынан рекордтық сұранысқа ие болып отырған Орта дәліз (Срединный коридор) арқылы транзитті барынша жылдамдатуға мүдделі.