В Атырау +29.8 
2026 жылғы 15 шілдеде Испания мен Ұлыбританияға қарасты Гибралтар тарихи келісім аясында шекарадағы қоршауды алып тастады. Паспорттық тексерулер енді құрлықтағы шекарада емес, әуежай мен портта жүргізіледі, деп хабарлайды Euronews.
Сейсенбі мен сәрсенбі түні екі жақтағы халық бұл оқиғаны тойлап, оны тарихи сәт деп атады. Жаңа ашылған өткел ондаған жылдар бойы жалғасқан тұрақты тексерулерге нүкте қойды.
Кадрларда Гибралтар бас министрі Фабиан Пикардо мен Ла-Линеа мэрі Хуан Хосе Франконың құшақтасып, бірге шекарадан өткені көрсетілген. Британдық кеденшілер халықтың қол шапалақтауы астында өз посттарын босатты. Жергілікті тұрғындар ту көтеріп, көшеде билеп, «Ақыры кезексіз» деген жазуы бар плакаттар ұстап шықты. Бұл оқиға Гибралтар мен Испания арасындағы жаңа дәуірдің басталуы ретінде қабылданды.
38 мың тұрғыны бар британдық аумақ пен Испания арасындағы шекарадағы қоршау түн ортасында толық алынды. Бұл ЕО мен Ұлыбритания арасындағы келісімге сәйкес жүзеге асты және Brexit-тен кейінгі ұзақ дауларды аяқтады. Келісім Гибралтарды іс жүзінде Шенген аймағына интеграциялайды: енді паспорттарды британдық және испандық қызметтер әуежай мен портта бірлесіп тексереді. Құрлықтағы шекараны күн сайын 15 мың испандық жұмысшы пайдаланады.
ЕО сауда жөніндегі өкілі Марош Шефчович бұл сәтті ерекше атап өтіп, төрт жылдық келіссөздерден кейін қоршаудың алынғанын маңызды оқиға деп атады. Ал Пикардо Гибралтар «цифрлық қамалға» айналғанын, жаңа камералар мен полицияның күшейтілген бақылауы енгізілгенін айтты. Аймақ 1713 жылы Ұлыбританияға берілгенімен, Испаниямен егемендікке қатысты дау әлі де жалғасуда.