В Атырау +25.7 
«ҚазМұнайГаз» (ҚМГ) ұлттық компаниясы басқарма мүшелеріне 2025 жыл үшін жарты миллиард теңгеден астам қаражат төленгені туралы ақпаратқа қатысты түсініктеме берді, деп хабарлайды «Нефть и газ Казахстана» телеграм-арнасы.
Бұған дейін ҚМГ басқарма мүшелерінің өткен жылғы сыйақысының жалпы көлемі 519 091 079 теңгені құрағаны белгілі болған еді. Басқарма құрамында 9 адам — төраға Асхат Хасенов пен оның сегіз орынбасары бар екенін ескеріп, желі қолданушылары әрқайсысына шамамен 60 миллион теңгеден келетін «орташа үлесті» есептей бастаған.
Алайда ұлттық компания бұл жерде қарапайым арифметиканың жүрмейтінін түсіндірді.
Бәрі KPI-ға байланысты
ҚМГ түсіндіргендей, әрбір топ-менеджердің жалақысы жеке есептеледі. Қорытынды сомаға негізгі тиімділік көрсеткіштері (KPI) тікелей әсер етеді.
«Сыйақы мен бонустардың көлемі әрбір нақты қызметкердің KPI көрсеткіштеріне қол жеткізуіне қарай есептеледі. Дәл осындай жүйе ҚМГ-ның еншілес және тәуелді ұйымдарында да қолданылады», — деп атап өтті компания өкілдері.
Бұл схеманы ұлттық компания басқармасының басшысы Асхат Хасенов те кулуарда растады.
«Әр компанияның өз KPI көрсеткіштері бар. Біз бұл көрсеткіштерді "ҚазМұнайГаздың" директорлар кеңесінде қорғаймыз. Нақты KPI орындалғаннан кейін ғана орындалу пайызы, бонустың көлемі және т.б. анықталады», — деді Хасенов.
Оңтайландыру және қысқарту
Миллиондық бонустар туралы әңгімеден бөлек, ҚМГ басшысы шығындарды оңтайландыру тақырыбына да тоқталып өтті. Оның айтуынша, ұлттық компания Мемлекет басшысының әкімшілік шығындарды қысқарту жөніндегі тапсырмасын орындап жатыр.
Мәселен, «ҚазМұнайГаздың» орталық аппаратында 47 қызметкер қысқартылған, бұл компанияның жалпы штатының 10 пайызын құрайды.